E gjithë bota në zi për vdekjen e Papa Françeskut, por Kina ende pa reagim zyrtar
Ndërsa bota mban zi dhe liderët botërorë kanë shprehur ngushëllimet e tyre për ndarjen nga jeta të Papa Françeskut, një shtet i rëndësishëm vijon të heshtë: Kina nuk ka bërë ende asnjë reagim apo deklaratë zyrtare për vdekjen e kreut të Kishës Katolike.
Mungesa e një qëndrimi publik nga ana e Pekinit vjen në sfondin e një historie të gjatë dhe të tensionuar marrëdhëniesh me Selinë e Shenjtë. Kina ndërpreu marrëdhëniet diplomatike me Vatikanin që në vitin 1951, për shkak të një mosmarrëveshjeje të thellë mbi emërimin e peshkopëve në territorin kinez. Qeveria kineze ka insistuar gjithmonë se shteti duhet të miratojë çdo emërim, ndërsa Kisha Katolike ka mbajtur qëndrimin se ky është një akt që i përket vetëm autoritetit të Papës.
Një përparim i dukshëm u arrit në vitin 2018, kur Vatikani dhe Kina nënshkruan një marrëveshje historike që i jep Pekinit njëfarë ndikimi në përzgjedhjen e peshkopëve. Kjo marrëveshje është rinovuar në nëntor të vitit të kaluar, pavarësisht polemikave dhe kritikave të shumta, sidomos nga qarqet konservatore brenda Kishës.
Në atë kohë, Selia e Shenjtë u shpreh se mbetej e përkushtuar ndaj një “dialogu të respektueshëm dhe konstruktiv” me Kinën. Megjithatë, në një moment kaq të rëndësishëm për botën katolike dhe për mbarë komunitetin ndërkombëtar, mungesa e një reagimi nga ana e Kinës ngre pikëpyetje mbi natyrën dhe të ardhmen e këtij dialogu.