Një zjarr i përmasave tragjike në resortin e skive Grand Kartal në Bolu, Turqi, ka shkaktuar vdekjen e 79 personave. Ngjarja tronditëse ndodhi mëngjesin e djeshëm, duke lënë pas një bilanc tragjik viktimash, shumica prej të cilëve ishin turistë dhe familje që ndodheshin për pushime dimërore në këtë destinacion të njohur.
Në kuadër të hetimeve të nisura, autoritetet turke kanë arrestuar 11 persona, mes tyre zëvendës kryetarin e bashkisë së Bolu, Sedat Gulener, dhe nënshefin e Zjarrfikësve, Kenan Koskun. Sipas Ministrisë së Drejtësisë, janë caktuar 7 prokurorë për të drejtuar hetimin, ndërsa zyrtarët lokalë akuzohen për neglizhencë dhe shkelje të rregullave të sigurisë.
Ministri i Drejtësisë, Yilmaz Tundz, deklaroi:
“Hetimi po kryhet me shumë ndjeshmëri dhe profesionalizëm. Të gjithë të dyshuarit do të përballen me ligjin.”
Nga 79 viktima, 56 janë identifikuar pas testit të ADN-së. Ndër të ndjerët ishin personalitete të njohura, familje të tëra dhe fëmijë:
•Familja Gültekin: Zehra Sena Gültekin, bashkëshorti Bilal Gültekin dhe tre fëmijët e tyre. Viktima të tjera përfshijnë vëllezërit dhe motrat e Bilalit, përfshirë Dr. Enes Gültekin.
•Familja Tüzgiray: Stomatologët Dr. Yasemen Boncuk Tüzgiray dhe Dr. Erhan Tüzgiray, bashkë me fëmijët e tyre Defne dhe Demir.
•Familja Tokcan: CEO i kompanisë “Inovat Energy Storage Solutions,” Can Tokcan, vëllai i tij Atıl Enis Tokcan dhe fëmijët e tyre Kemal dhe Atlas Kaan.
•Të diplomuar të Kolegjit Amerikan Tarsus: Mert Doğan, gruaja Duygu dhe fëmijët Mavi dhe Doğa.
•Studentë të Kolegjit TED: Alican Boduroğlu, motra Elif Nas dhe nëna e tyre Ebru.
Ndër viktimat janë gjithashtu akademikë, sportistë dhe drejtues të shquar të komunitetit.
Sipas hetimeve paraprake, dyshohet se zjarri ka shpërthyer për shkak të një problemi në sistemin e ngrohjes, ndërsa masat e sigurisë në resort dyshohet të kenë qenë të pamjaftueshme.
Tragjedia ka ngjallur reagime të forta në Turqi, ndërsa qeveria është zotuar për masa të rrepta ndaj përgjegjësve. Familjarët e viktimave kanë bërë thirrje për drejtësi, ndërsa organizatat ndërkombëtare kanë shprehur ngushëllimet e tyre.
Hetimet pritet të zbardhin të gjitha rrethanat dhe përgjegjësitë për këtë ngjarje tragjike që tronditi Turqinë dhe mbarë opinionin publik.