“Të duket sikur je duke përjetuar pasojat e një lufte bërthamore.. një lagje e tërë u zhduk përpara syve të mi”. Kështu e përshkroi një i mbijetuar i ciklonit Chido kalimin e stuhisë tmerruese në arkipelagun francez të Mayotte në Oqeanin Indian, ku ka lënë pas shkatërrime të paimagjinueshme e ku autoritetet pohojnë se numri i viktimave mund të mbërrijë edhe në mijëra.
Cikloni e goditi në Mayotte gjatë natës, tha administrata zyrtare e meteorologjisë Meteo-France, sipas të cilëve, kjo ishte stuhia më e fuqishme që ka goditur ishullin në mbi 90 vite. Pamjet e marra nga ajri nga forcat e xhandarmërisë franceze tregonin rrënojat e qindra barakave nëpër kodrat e njërit prej ishujve Mayotte, ku ka patur një përqendrim emigrantësh të paligjshëm nga Comorosi fqinj.
Duhen katër ditë udhëtim me anije që të mbërrihet në Mayotte, e gjendur gati 8 mijë kilometra larg Parisit. Mayotte është më e varfër se pjesa tjetër e Francës dhe është përballur prej dekadash me dhunën nga bandat dhe trazirat sociale. Rreth 77% e banorëve të saj jetojnë nën pragun e varfërisë.