Rihapet dosja e krimit të dyfishtë në Gjermani: Dy shqiptarë të vrarë në vitin 1999, njëri i lidhur me gruan e bosit të drogës – hetuesit besojnë se muri i heshtjes po çahet

Një nga ngjarjet më misterioze dhe të përgjakshme të botës së krimit shqiptar në Gjermani po rikthehet sërish në vëmendje, ndërsa autoritetet gjermane kanë vendosur të rihapin dosjen e vrasjes së dyfishtë të ndodhur më 7 qershor 1999 në Essen-Schonnebeck. Dy të rinj shqiptarë, Altan B. dhe Alban M., u qëlluan për vdekje me armë zjarri në një rrethrrotullim pranë një qendre azilkërkuesish, por autorët e këtij krimi nuk u zbuluan kurrë.

Dosja po hetohet nga dy ish-hetues, Detlef Büttner dhe Michael Detscher, të cilët, edhe pse tashmë në pension, kanë marrë përsipër të çajnë murin e heshtjes që për dekada e ka mbuluar këtë krim mafioz.

Krimi i dyfishtë

Ishte ora 23:15 e një të hëne kur një person anonim telefonoi policinë duke raportuar të shtëna armësh në Garnbleiche. Kur patrullat mbërritën në vendngjarje, gjetën një automjet Ford Escort me targa të Essen-it dhe pranë tij trupat pa jetë të dy shqiptarëve, 20 dhe 24 vjeç, të mbuluar në gjak. Rreth e rrotull u gjetën një numër i madh gëzhojash të kalibrit 7.65 mm, kalibër që përdorej shpesh nga kriminelët në atë kohë.

Njëri prej viktimave mbante ende në dorë çelësin e makinës, ndërsa sedilja e shoferit ishte palosur përpara, çka shton dyshimet se të rinjtë ishin gati të largoheshin, ndoshta pasi kishin përfunduar një pazar droge. Nuk përjashtohet mundësia që të ishin thirrur me qëllim për t’u futur në kurth.

Pistat kryesore të hetimit

Sipas hetuesve, dy të rinjtë nga Kosova, të cilët ishin përfshirë në tregtinë e drogës në Essen, njiheshin si brutalë dhe të pamëshirshëm në rivalitetet brenda tregut të trafikut. Ata nuk kishin asgjë për të humbur, pasi ishin larguar nga një atdhe i shkatërruar nga lufta.

Policia dyshon se pas vrasjes qëndronte hakmarrja e një drejtuesi të bandës shqiptare të drogës në Essen, i cili, ndërsa ndodhej në burg, kishte mësuar se njëri prej viktimave kishte nisur një lidhje intime me gruan e tij dhe kishte përvetësuar para nga pazaret e drogës. Pikërisht kjo lidhje mendohet të ketë qenë motivi kryesor i ekzekutimit.

Viktimat dyshohet se janë mashtruar përmes një telefonate për të ardhur në vendin ku më pas u qëlluan nga afër me dy pistoleta. Autorët, sipas dëshmive, u larguan me një makinë të kuqe, por nuk u identifikuan kurrë. Armët e përdorura nuk u gjetën, dhe provat materiale ishin të pamjaftueshme për të ngritur akuza ndaj personave të ndaluar në atë kohë.

Heshtja dhe frika nga hakmarrja

Pesë shqiptarë u arrestuan menjëherë pas krimit, por nuk pati prova të mjaftueshme për t’i lidhur me vrasjen. Policia deklaroi se ata “nuk mundën ose nuk deshën të flisnin”, nga frika e ndëshkimit si tradhtarë ose për shkak të përfshirjes së tyre në trafikun e drogës.

Në atë kohë, banorët e qendrës së azilkërkuesve në Garnbleiche – kryesisht refugjatë nga Kosova – konsideroheshin si pjesë e një komuniteti të mbyllur dhe të lidhur fort përmes lidhjeve familjare e vendlindjeje. Në këtë realitet, zbatohej “ligji i heshtjes”, tipik i botës së krimit të organizuar: kush flet, vdes.

Pse rihapet dosja sot?

Hetuesit Büttner dhe Detscher shpresojnë se pas më shumë se dy dekadash, ky mur i heshtjes ka filluar të plasaritet. Ata besojnë se të përfshirët ose dëshmitarët e asaj kohe – shumë prej të cilëve tashmë të shkëputur nga aktiviteti kriminal – nuk kanë më frikë të flasin. Banda e dikurshme shqiptare që kontrollonte trafikun e drogës në Essen nuk është më aktive, çka e bën më të mundur bashkëpunimin me drejtësinë.

Hetimet janë përqendruar te mundësia e identifikimit të organizatorëve dhe autorëve të vrasjes, përmes dëshmive të reja ose lidhjeve të mundshme që kanë mbetur në heshtje deri tani.