“Vëllai im ka vdekur”, zbulohet arsyeja pse legjenda e futbollit mungoi në ceremoninë e Diogo Jota

Dhimbja dhe tronditja nga vdekja e Diogo Jotës dhe vëllait të tij André Silva, të cilët humbën jetën në një aksident tragjik automobilistik ka kapluar botën që prej së enjtes. Në ceremoninë mortore ishin të pranishëm shumë personalitete, nga shokët e ekipit, stafi teknik, deri te drejtuesit e klubit.

Megjithatë, mungesa e një emri të madh bëri bujë: legjenda e Liverpool-it dhe golashënuesi më i mirë në historinë e klubit, Ian Rush. I konfirmuar për të marrë pjesë në ceremoni, Rush nuk mundi të udhëtonte drejt Portugalisë për shkak të një arsyeje personale, vdekjes së vëllait të tij, Gerald. Në një postim prekës në rrjetet sociale, Rush shpjegoi arsyen e mungesës dhe ndau kujtimet e tij për Jotën. Rush shtoi se dhimbja është e thellë dhe ende e pabesueshme.

“Në Liverpool gjithmonë e kemi konsideruar veten një familje të madhe. Tani një nga familja jonë ka ikur, kështu që duhet të bashkohemi dhe të ndihmojmë njëri-tjetrin. Ditët e fundit e kanë treguar këtë. Isha i ftuar dhe i planifikuar të merrja pjesë në funeralin e Diogos, por vëllai im Gerald ndërroi jetë javën e kaluar dhe unë isha në mes të funeralit të tij kur u përhap lajmi për Diogon. Ishte një kohë tepër e vështirë dhe nuk munda ta përballoja. Gruaja e Diogos, Rute, tre fëmijët e tyre të mrekullueshëm, prindërit e tij dhe familja e zgjeruar po përballen me një humbje të paimagjinueshme. Ky aksident zemërthyes ka marrë jetën si të Diogos ashtu edhe të vëllait të tij, André Silva. Jemi thellësisht të trishtuar nga të dy.” shkruan Rush.

Funerali i Jotës dhe André Silvës u shndërrua në një ngjarje kombëtare zie në Portugali, ku figura nga sporti, politika dhe bota e artit morën pjesë në homazhe.