PD kërkon mbylljen e zyrës elektorale të PS në Delvinë, Zhupa: Shkelje e ligjit zgjedhor!
Partia Demokratike ka kërkuar nga Komisioneri Shtetëror i Zgjedhjeve, Ilirjan Celibashi, mbylljen e zyrës elektorale të Partisë Socialiste në Delvinë, duke e konsideruar atë në shkelje të legjislacionit zgjedhor.
Deputetja demokrate Ina Zhupa, përmes një deklarate nga Delvina, ka denoncuar vendosjen e kësaj zyre në një distancë më të afërt se 50 metra nga Komisioni Zonal i Administrimit të Zgjedhjeve (KZAZ). Sipas saj, kjo bie ndesh me ligjin, i cili parashikon një distancë minimale prej 300 metrash midis zyrave elektorale dhe KZAZ-ve apo qendrave të votimit.
Zhupa: PS po bën propagandë përballë KZAZ-së
“Sapo zbret shkallët e KZAZ-së, përballesh me propagandën e Partisë Socialiste, që pret votuesit ditën e zgjedhjeve apo administratën zgjedhore gjatë punës së tyre në KZAZ. Kjo është e ndaluar nga ligji,” u shpreh Zhupa.
Deputetja i ka bërë thirrje Komisionerit Shtetëror të Zgjedhjeve të ndërhyjë menjëherë për mbylljen e kësaj zyre, duke e konsideruar një shkelje të hapur të rregullave zgjedhore nga ana e socialistëve.
Ndërkohë, nga Partia Socialiste ende nuk ka një reagim zyrtar për këtë çështje.