Kreu i SPAK, Dumani: Prokurorët duhet të kenë mundësi për rikandidim pas mandatit 9-vjeçar, vlerësimi të bëhet në bazë të …
Në raportimin e tij vjetor të vitit 2024, Altin Dumani kërkoi që prokurorëve të SPAK t’u jepet mundësia të rikandidojnë pas përfundimit të mandatit.
Sipas Dumanit, Këshilli i Lartë i Prokurorisë do të vlerësojë nëse prokurori përkatës që rikandidon ka bërë një punë të mirë gjatë 9 viteve, për t’i dhënë mundësinë e një mandati tjetër.
“Në mbarim të mandatit 9-vjeçar, prokurorëve të SPAK t’u jepet mundësia për të rikandiduar së bashku me Prokurorët e Juridiksionit të Përgjithshëm që duan të bëhen pjesë e SPAK. Në këtë mënyrë vlerësojmë se realizohet edhe rinovimi i kolektivit të SPAK, por bëhet e mundur edhe vijimësia e veprimtarisë së institucionit. Përmes kësaj formule, prokurët e SPAK të kenë mundësi të rikandidojnë, t’u thuhet nëse nuk mund të vazhdoni më tej sepse në vlerësimin e këshillit performanca juaj gjatë këtyre 9 viteve nuk është e tillë sa të japë një mundësi të dytë. Të kenë mundësi që në përfundim të mandatit 9-vjeçar të atashohen pranë Prokurorisë së Apelit. Unë jam për variantin e parë që prokurorët e posaçëm në përfundimin e mandatit t’u jepet mundësia për rikandidim për një mandat tjetër në SPAK. Të rikandidojnë, jo riemërim“, u shpreh Dumani.