TIRANË- Gjykata ka caktuar masën e sigurisë “arrest me burg” për ish-zyrtaren Alda Klosin. Aktualisht kjo e fundit ndodhet e shtruar në QSUT për shkak të problemeve shëndetësore. Më herët, në ambientet e spitalit në QSUT-së u paraqit dhe avokati Klosit, Ilirjan Muho si dhe gjyqtari Arben Micko dhe prokurorja e çështjes, për procedurat e ndjekura në këto raste.
Mbi Alda Klosin rëndojnë tre akuza, pastrim parash, fshehje të pasurisë dhe deklarim i rremë në hetuesi. Kujtojmë që ajo doli zbuluar nga pastruesja e shtëpisë, Rozeta Dodi e cila vodhi në banesën e saj plot 120 mijë euro dhe bizhuteri floriri.
Klosi është arrestuar me 3 shkurt pas një dëshmie që ka dhënë në polici ish-pastruesja e saj, Rozeta Dodi. Ajo dëshmoi në prokurori se paratë e vjedhura nuk kanë qenë të saj, por të xhaxhait dhe nuses së xhaxhait të saj.
Avokati i Alda Klosit, tha për mediat se deklarimet e pastrueses janë tërësisht të pavërteta dhe se vendimi i Gjykatës është i padrejtë. Sa i takon gjendjes shëndetësore të klientes së tij, avokati u shpreh se ajo është e sëmurë dhe po mbahet nën kujdesin e mjekëve.
“Deklarimet e shtetases Rozeta Dobi janë deklarime të pavërteta. Është e sëmurë [referuar klientes Alda Klosit] dhe nën kontrollin e mjekëve”, tha ai.
Pjesë nga dëshmia e Alda Klosit para hetuesve:
I është marrë deklarim të dëmtuares Alda Klosi e cila në lidhje me sendet e gjetura ka deklaruar se, gjatë kësaj kohe ka menduar me qetësi për sendet që ka patur dhe deklaron se ditën e ngjarjes i jane vjedhur një shumë në valutë të huaj më shumë se 120.000(njëqind e njëzetmije) euro, të cilat kanë qenë në prerje 500(peseqindeshe) dhe 200(dyqindeshe) si dhe një shumë prej 30.000(tridhjetëmije) dollare të cilat kanë qenë prerje 100(njëqindëshe) Deklaron se këto para i kishte të xhaxhait dhe nuses së xhaxhait të saj i cili i’a ka lënë për të kompletuar shtëpinë e tyre dhe për nevoja të tyre pasi xhaxhain e ka të sëmurë me kancer dhe për çdo nevojë që do të kishte, pasi djali i tyre është me probleme dhe këto lekë janë të mbledhura ndër vite nga ana e tyre pasi jetojnë në Amerikë dhe në këtë kohë ai po kurohet në Amerikë.