Aksident me 3 të plagosur në Gjormë, një në gjendje të rëndë drejt Tiranës
Një aksident është regjistruar në fshatin Gjorëm, ku dy automjete janë përplasur mes tyre, duke shkaktuar tre të plagosur.
Sipas burimeve zyrtare, si pasojë e përplasjes kanë mbetur të plagosur lehtë dy drejtuesit e mjeteve, ndërsa një pasagjer ka pësuar dëmtime të rënda. Ky i fundit është transportuar me urgjencë drejt Spitalit të Traumës në Tiranë, ku po merr ndihmën e nevojshme mjekësore.
Nga hetimet paraprake, rezulton se njëri prej drejtuesve ishte nën efektin e alkoolit, ndaj është shoqëruar në Komisariatin e Policisë për veprime të mëtejshme procedurale. Grupi hetimor ndodhet në vendngjarje dhe po punon për zbardhjen e plotë të rrethanave të aksidentit.
Policia apelon për respektimin e rregullave të qarkullimit rrugor dhe shmangien e drejtimit të mjetit nën ndikimin e alkoolit, sidomos gjatë sezonit veror, kur qarkullimi në akset rrugore rritet ndjeshëm.