Afera ‘Partizani’/ GJKKO bindet nga Jamarbër Malltezi, i ndryshon masën e sigurisë
Gjykata e Posaçme Kundër Korrupsionit dhe Krimit të Organizuar (GJKKO) ka vendosur sot të ndryshojë masën e sigurisë ndaj Jamarbër Malltezit, dhëndrit të ish-kryeministrit Sali Berisha, i cili është nën hetim për përfshirje në aferën e njohur si “Partizani”.
Malltezi ka ofruar garanci pasurore prej 30 mijë euro, ku prej 2 vitesh ishte në masën e sigurisë “arrest shtëpie”.
Pas paraqitjes së argumenteve nga avokatët mbrojtës dhe vetë Malltezi, GJKKO është bindur se kushtet për masën aktuale të sigurisë kanë ndryshuar. Në vendim thuhet se gjykata ka marrë në konsideratë faktin se nuk ekziston më rreziku për prishje të provave apo largim nga drejtësia.
Malltezi sulmoi drejtësinë duke deklaruar se gjithçka ishte një urdhër politik i Edi Ramës.
“Kemi zëvendësimin e masës me garanci pasurore. Ka mbi 20 muaj që kjo ishte një farsë politike, ishte një urdhër politik. Nuk kemi të bëjmë me një shtet ligjor, por me një shtet që lufton armiqtë e PS. Vendimi i sotëm vjen pas 20 muajsh privim lirie thjesht me një urdhër politik të Edi Ramës. E mbani mend se si në Kongresin e PS Edi Rama urdhëroi SPAK të procedojë penalishët Sali Berishën, të njëjtën gjë e kërkoi edhe ambasadorja e korruptuar amerikane si Yuri Kim. Prandaj kemi të bëjmë me një proces politik,” deklaroi Malltezi.