Presidenti francez Emmanuel Macron dhe kryeministri britanik Rishi Sunak u takuan në Paris në një Samit që synon rregullimin e raporteve mes tensioneve të shkaktuara pas largimit të Britanisë së Madhe nga Bashkimi Evropian (Brexit).
Gjatë Samitit, dy vendet pritet të diskutojnë përmirësimin e bashkëpunimit ushtarak dhe ekonomik, si dhe të shtojnë përpjekjet për të ndaluar kalimet e paligjshme të emigrantëve përmes Kanalit nga Franca në Angli.
Samiti franko-britanik, i pari i llojit të tij që nga vitit 2018, pritet të dëshmojë hapjen e një “kapitulli të ri” në raportet midis dy vendeve, tha zyra e presidentit Macron. Samite të tilla janë mbajtur çdo vit në të kaluarën.
Vizita e Sunak vjen dy javë përpara se mbreti Charles III të udhëtojë në Francë dhe më pas në Gjermani për vizitat e tij të para shtetërore si monark, në përpjekjet e mëtejshme britanike për të ndërtuar ura me fqinjët evropianë.
“Samiti do të jetë mbi të gjitha një mundësi për të riafirmuar dhe thelluar bashkëpunimin e ngushtë në drejtim të mbështetjes ushtarake për Ukrainën”, thuhet në deklaratën nga zyra e Macron, pasi të dyja vendet janë të vetmet fuqi bërthamore në rajon.
Muajin e kaluar, Mbretëria e Bashkuar dhe BE njoftuan një përparim në bisedimet për të zgjidhur mosmarrëveshjen mbi marrëveshjet tregtare pas Brexit-it për Irlandën e Veriut.