Rusia “breshëri” dronësh dhe raketash mbi Ukrainë, të paktën katër viktima

Rusia ka ndërmarrë një nga sulmet më të mëdha ajrore ndaj Ukrainës që nga fillimi i pushtimit, duke lëshuar gjatë natës së të shtunës një breshëri prej 597 dronësh sulmues dhe karrem, si dhe 26 raketa lundrimi, duke goditur kryesisht qytetet perëndimore të vendit.

Sipas Forcave Ajrore të Ukrainës, 319 dronë të tipit Shahed, të prodhuar në Iran, dhe 25 raketa u rrëzuan nga mbrojtja ajrore ukrainase. Megjithatë, rreth 20 dronë dhe një raketë arritën të godasin objektiva në të paktën pesë lokacione, përfshirë Chernivtsi, Lviv dhe Lutsk.

Në qytetin Chernivtsi, afër kufirit me Rumaninë, guvernatori Ruslan Zaparaniuk konfirmoi vdekjen e të paktën dy personave dhe plagosjen e 14 të tjerëve, ndërsa zyrtarët lokalë njoftuan për disa zjarre, si dhe dëmtime në shtëpi banimi dhe ndërtesa administrative. Ndërkohë, kryetari i bashkisë së Lvivit, Andriy Sadovyi, raportoi se nga sulmi u dëmtuan 46 shtëpi, një ndërtesë universiteti, gjykatat e qytetit, si dhe rreth 20 ndërtesa biznesi.

Presidenti ukrainas Volodymyr Zelensky reagoi menjëherë, duke i bërë thirrje aleatëve perëndimorë për veprime të shpejta dhe të vendosura.

“Ritmi i sulmeve ajrore ruse kërkon vendime të shpejta dhe mund të frenohet që tani përmes sanksioneve,” tha Zelensky. Ai kërkoi ndëshkime të ashpra për ata që “ndihmojnë Rusinë të prodhojë dronë dhe përfitojnë nga nafta ruse”.

Ministri i Jashtëm ukrainas, Andriy Sybiha, dënoi ashpër sulmet, duke i quajtur “akt tjetër terrori masiv nga Rusia” dhe duke paralajmëruar se makineria ushtarake ruse po përbën një kërcënim serioz për sigurinë e të gjithë komunitetit transatlantik.

Ky është një nga sulmet më të mëdha ajrore që nga fillimi i luftës në shkurt 2022, duke ngritur sërish alarmin për nevojën urgjente të ndihmës ushtarake dhe sanksioneve më të forta ndërkombëtare kundër Kremlinit dhe partnerëve të tij.