Përfundon pa marrëveshje rritja e tavanit të borxhit në SHBA

Presidenti Joe Biden dhe kryetari i Dhomës së Përfaqësuesve Kevin McCarthy nuk mundën të arrinin një marrëveshje se si të rrisnin tavanin e borxhit.

 KEVIN MCCARTHY KRYETAR I DHOMËS SË PËRFAQËSUESVE: Unë mendoj se ne të dy jemi dakord se duam të arrijmë një marrëveshje. Të dy jemi dakord për fushat për të cilat e dimë se ka mosmarrëveshje. Besoj se do të arrijmë gjuhën e përbashkët.

Demokratët dhe republikanët kanë vetëm 10 ditë për të arritur një marrëveshje – deri më 1 qershor – për të rritur kufirin e vetëhuamarrjes së qeverisë, sepse në të kundërt mund të shkaktojë recesion dhe pasojat do t’i vuanin edhe ekonomitë e tjera.

Biden tha para fillimit të takimit se ai ishte optimist se ata mund të bënin një përparim, por edhe këtë herë nuk prodhoi asnjë rezultat. “Ne të dy folëm për nevojën për një marrëveshje dypartiake”, tha Biden në fillim të takimit.

Republikanët duan shkurtime të shpenzimeve, kërkesa të reja pune për disa programe për amerikanët me të ardhura të ulëta dhe një rikthim të ndihmës për COVID-19 duke kufizuar shpenzimet ne vitin 2024, ndërsa demokratët duan të mbajnë shpenzimet të qëndrueshme në nivelet e këtij viti në vitin 2024. Një plan i miratuar nga Dhoma e Përfaqësuesve muajin e kaluar do të shkurtonte një pjesë të gjerë të shpenzimeve qeveritare me 8% vitin e ardhshëm.

Çdo marrëveshje për të rritur kufirin duhet të kalojë të dyja dhomat e Kongresit, dhe për këtë arsye varet nga mbështetja dypartiake. Republikanët e McCarthy kontrollojnë Dhomën 222-213, ndërsa demokratët e Biden-it mbajnë Senatin 51-49.

Ekonomistët paralajmërojnë se një mospagim i gjatë mund ta dërgojë ekonominë amerikane në një recesion të thellë me papunësi në rritje, ndërsa destabilizon një sistem financiar global të ndërtuar mbi bonot amerikane.