Hajduti gëlltit vathët e diamantit me vlerë 769,500 dollarë për t’i fshehur, si i zbuloi policia

Një hajdut në Orlando, Florida, ka gëlltitur dy palë vathë diamanti Tiffany & Co., me vlerë totale prej 769,500 dollarësh, në përpjekje për t’i fshehur nga policia.

Sipas autoriteteve, 32-vjeçari Jaythan Gilder i gëlltiti bizhuteritë rreth kohës kur u arrestua më 26 shkurt. Ai më pas u mbajt nën mbikëqyrje në një spital për më shumë se dy javë, derisa vathët u nxorën nga trupi i tij.

Si ndodhi vjedhja?

Policia thotë se Gilder u shtir si asistent i një lojtari të NBA-së për të fituar akses në dhomën VIP të një dyqani Tiffany & Co. në Orlando, ku iu shfaqën bizhuteri të shtrenjta. Ai dyshohet se ka shpërqendruar punonjësit dhe është larguar me vrap me dy palë vathë diamanti, ndërsa gjatë arratisjes hodhi një unazë me vlerë 587,000 dollarë.

Kur u arrestua, oficerët panë që ai po gëlltiste sende të ndryshme, të cilat më vonë rezultuan të ishin vathët e vjedhur. Në burg, ai raportohet se pyeti stafin: “A do të fajësohem për atë që kam në stomak?”.

Kapja e hajdutit

Pasi një rreze X tregoi praninë e objekteve të huaja në stomakun e tij, Gilder u dërgua në spital dhe u monitorua derisa bizhuteritë dolën nga trupi i tij. Më 12 mars, policia konfirmoi se kishte rikuperuar edhe vathin e fundit. Bizhuteritë u kthyen te Tiffany & Co., ku u verifikua se numrat serialë përputheshin me ato të vjedhura.

Gilder ndodhet aktualisht në burgun e Orange County dhe përballet me akuzën e grabitjes së madhe të shkallës së parë. Policia thotë se ai ka një histori kriminale të ngjashme, përfshirë një grabitje në një dyqan Tiffany & Co. në Teksas në vitin 2022, si dhe 48 urdhër-arreste të veçanta në Kolorado.