Zelensky flet pas takimit të tensionuar me Trump: Nuk mendoj se i detyrohem një falje, por raporti ynë mund të shpëtohet!

  • 1 March, 2025

Një ditë pas takimit të tensionuar në Shtëpinë e Bardhë me presidentin amerikan Donald Trump, presidenti ukrainas Volodymyr Zelensky ka dhënë një intervistë për Fox News.

Zelensky ka thënë se nuk mendon se i detyrohet një falje presidentit amerikan Donald Trump, pas takimit të tensionuar një ditë më parë.

Kujtojmë se sekretari amerikan i Shtetit, Marco Rubio i kërkoi më herët Zelenskyt të kërkonte falje pas përplasjes me presidentin Trump në zyrën ovale të Shtëpisë së Bardhë.

“Ai duhet të kërkojë ndjesë për humbjen e kohës sonë me një takim që përfundoi në këtë mënyrë,”deklaroi Sekretari amerikan i Shtetit, Marco Rubio, gjatë një interviste për CNN.

Nga ana e tij Zelensky theksoi se marrëdhënia mes tyre mund të shpëtohet dhe të përmirësohet.

“Po sigurisht (mund të shpëtohet), sepse janë marrëdhënie (ndërmjet) më shumë se dy presidentëve. Janë marrëdhënie historike, marrëdhënie të forta mes popullit tonë. Dhe kjo është arsyeja pse unë gjithmonë filloj (duke falënderuar) njerëzit tuaj nga njerëzit tanë. Dhe kjo është më e rëndësishmja”, tha Zelensky gjatë intervistës, raporton CNN.

Udhëheqësi ukrainas pranoi se “përplasja” e tij me Trump dhe zëvendëspresidentin JD Vance “nuk ishte gjë e mirë për asnjërën palë”.

Zelensky iu përgjigj gjithashtu komenteve të senatorit republikan amerikan Lindsey Graham, i cili e kishte quajtur konfrontimin “mosrespektues” dhe tha se Zelensky “duhet të japë dorëheqjen ose të dërgojë dikë me të cilin mund të bëjmë biznes”.

“Me gjithë respektin për Lindsey, nëse mund të them Lindsey ne e njohim njëri-tjetrin, por vetëm Ukraina voton për presidentin e vetë, secili vend voton për presidentin e vetë.”

Zelensky tha se “Ukraina dëshiron paqe”, e cila do të arrihet sipas tij vetëm përmes diplomacisë dhe negociatave dhe se Ukraina duhet të ishte shumë e fortë në tryezën e negociatave.
Tags:

Artikuj të ngjashëm