Deputeti i PS, Xhemal Qefalia ishte në SPAK, për të dhënë sqarime për ngjarjen e 21 janarit. Qefalia u thirr si person që dijeni për çështjen që po heton Prokuroria e Posaçme. Pas daljes nga SPAK ai tha se u pyet si një nga protestuesit.
“U pyeta si një nga protestuesit e ‘21 janarit’. Shpresoj të zbardhet”, deklaroi ai.
Ndërkaq, në Kuvend, Qefalia, ka treguar arsyen se pse u thirr sot në Prokurorinë e Posaçme. Në një replikë ndaj demokratit, Enkelejd Alibeaj, Qefaliaj tha se në SPAK u thirr për të dëshmuar për 21 Janarin.
Qefalia iu drejtua Alibeajt, duke i thënë se në SPAK i kanë treguar një foto, duke e pyetur ‘A është Enkelejdi ky që ka automatik, që po u gjuan protestuesve?’.
“Enkelejd, isha në SPAK dhe dëshmova për 21 Janarin. Po ajo që më habiti, ishte se më thanë për një fotografi, më thanë ‘A është Enkelejdi ky që ka automatik, që po u gjuan protestuesve?’. Jo jo i thash se Enkelejdi ka qenë këshilltar, ka qenë brenda. Zotëri, se sa herë ndërron ngjyrën ti, herë Lul, herë Berishë, herë 1912, ti mbetesh Enkelejdi, që vjen tani dhe të ka ardhur zëri pasi ikën këta për të folur. Ne do i përgjigjemi SPAK-ut se kemi besuar të drejtësia, një drejtësi që do vendoset për të gjithë. Te ajo fotografia nuk ishe ti, se ishte veshur me një formë tjetër, ishe mbyllur atje brenda të ajo kështjella që vratë dhjetëra demonstrues” tha Qefalia.