Këngëtarja shqiptaro-amerikane Bebe Rexha ka reaguar ashpër në rrjetet sociale pasi disa media, mes tyre Daily Mail, publikuan foto të saj në një gjendje jo të mirë shëndetësore. Fotografitë e saj u bënë ndërsa ajo po hynte në spital, ku ishte e shtruar për tre ditë për shkak të një gripi të rëndë në stomak.
Në një postim në Instagram, Bebe shprehu zemërimin për mënyrën se si paparacët e kanë ndjekur dhe e kanë fotografuar në një moment të vështirë për të.
“E di që ka një imazh të caktuar timin që po merr shumë vëmendje për pamjen time. Kam qenë në spital për tre ditët e fundit me një grip të rëndë në stomak dhe ajo isha unë duke hyrë në spital. Kush pret jashtë një spitali për të bërë fotografi të njerëzve që hyjnë?! Kur do të ndalojnë paparacët së shfrytëzuari gratë në momentet e tyre më të këqija! Jam e tërbuar. As nuk mund të jesh e sëmurë në paqe,” shkroi ajo.
Më tej, ajo sulmoi hapur Daily Mail dhe gazetaren Sonia Horon, duke i akuzuar për mungesë etike dhe manipulim të situatës.
“@dailymail Ju jeni vërtet të neveritshëm. Ju e dinit që ato fotografi të miat u bënë jashtë spitalit. Kush bën fotografi të njerëzve të sëmurë duke hyrë në spital dhe më pas e fokuson artikullin tek pamja e tyre?! Pse nuk thatë që ajo po hynte në spital?! Sepse e dini që është gabim. @soniahoron, sidomos duke qenë një grua, duhet të ndihesh e turpëruar për veten,” shkroi Rexha, duke përdorur edhe një fyerje për gazetaren.
Ky reagim ka marrë mbështetje të madhe nga fansat e saj, të cilët dënojnë ndërhyrjen e tepruar të mediave në jetën private të artistëve.
