U qëllua me plumb në kokë në Kolumbi, si është gjendja e kandidatit për president

Një ngjarje tronditëse ka ndodhur në Kolumbi, ku kandidati presidencial dhe njëkohësisht senatori konservator, Miguel Uribe Turbay, është plagosur rëndë pas një atentati të kryer gjatë një takimi elektoral në kryeqytetin Bogota. Ngjarja ka ndodhur të shtunën pasdite në një park të mbushur me dhjetëra përkrahës të politikanit.

Sipas raportimeve zyrtare, Uribe është qëlluar tri herë me armë zjarri, dy herë në kokë, duke e lënë atë në gjendje tejet të rëndë për jetën. Ai u transportua me urgjencë në spitalin “Santa Fe”, ku ndodhet në njësinë e kujdesit intensiv pas ndërhyrjeve të menjëhershme kirurgjikale nga ekipi mjekësor.

Policia ka bërë të ditur se autori i dyshuar i atentatit është një i mitur 15-vjeçar, i cili u plagos nga forcat e rendit gjatë ndjekjes dhe u kap në vendngjarje. Hetimet janë në zhvillim e sipër për të zbardhur motivet dhe nëse i mituri ka vepruar i vetëm apo ka pasur bashkëpunëtorë.

Maria Claudia Tarazona, bashkëshortja e senatorit, ka apeluar me emocion për solidaritet kombëtar, duke u bërë thirrje qytetarëve që të luten për shëndetin e Miguel Uribe Turbay.

“Kërkoj nga çdo qytetar që të bashkohemi në lutje. Migueli është një burrë me kurajë dhe nuk do të dorëzohet,” u shpreh ajo.

Ndërkohë, presidenti aktual i Kolumbisë, Gustavo Petro, ka reaguar me një mesazh të fortë në rrjetet sociale:

“Kjo është një ditë e trishtuar për Kolumbinë. Mund të kemi dallime politike, por ato nuk kanë vlerë përballë jetës së një njeriu. Të bashkohemi për Miguel Uriben dhe familjen e tij,” shkroi ai në platformën X.

Sulmi ndaj kandidatit ka shkaktuar reagime të ashpra në mbarë vendin dhe ka ngritur pikëpyetje serioze mbi sigurinë e fushatës elektorale, në një kohë kur Kolumbia po përgatitet për zgjedhjet presidenciale. Forcat e sigurisë kanë shtuar praninë e tyre nëpër qytete dhe janë në gatishmëri për të parandaluar çdo përshkallëzim të mëtejshëm.