Tragjike/ Ish-“Miss Evropa-Kosova” humb jetën pasi u hodh nga ura për t’i shpëtuar policisë pasi ishte e dehur! E përplasi një makinë në autostradë

Një ngjarje tragjike ka tronditur opinionin publik në Turqi, ku 27-vjeçarja Guler Erdogan, e njohur si ish “Miss Evropa-Kosova”, ka humbur jetën në mënyrë të tmerrshme teksa tentonte t’i shpëtonte policisë. E reja, e cila po kthehej nga një natë me miq në qytetin e saj të lindjes, Giresun, u ndalua nga oficerët e policisë për një kontroll rrugor, ku rezultoi se po drejtonte makinën nën efektin e alkoolit.

Sipas mediave turke, përfshirë CNN Turk, testi i alkoolit tregoi se Erdogan kishte 1.70 mg/100 ml alkool në gjak, shumë mbi kufirin e lejuar në Turqi, që është 0.5 mg/100 ml. E frikësuar për pasojat ligjore, 27-vjeçarja braktisi automjetin dhe u përpoq të largohej me vrap, por përfundoi duke u rrëzuar nga një urë rreth 15 metra e lartë, mbi një autostradë me gjashtë korsi.

Fatkeqësisht, pas rënies, ajo u përplas nga një makinë që po kalonte në atë moment, duke i shkaktuar vdekjen e menjëhershme. Ekipet e emergjencës mbërritën në vendngjarje, por nuk mundën të bënin asgjë për të shpëtuar jetën e saj.

Ngjarja ka shkaktuar reagime të shumta në rrjete sociale dhe media. Ndërsa autoritetet vazhdojnë hetimet, familja e Guler Erdogan ka reaguar përmes një postimi në Facebook, ku e përshkruajnë vdekjen e saj si një aksident tragjik dhe u bëjnë thirrje qytetarëve të mos besojnë në spekulimet që po qarkullojnë në media.

“Mos i besoni lajmeve dhe informacioneve të rreme për vdekjen e vajzës, motrës dhe mikes sonë të dashur, Guler Erdogan. Motra jonë humbi jetën për shkak të një aksidenti,” thuhet në deklaratën e familjes.

Vdekja e saj ka tronditur jo vetëm rrethin e ngushtë familjar, por edhe komunitetin e modës dhe bukurisë në Kosovë e Turqi, ku ajo ishte bërë e njohur për titullin “Miss Evropa-Kosova”.