Një ngjarje tragjike ka tronditur mbrëmjen e së shtunës fshatin Jabllanicë të Gjakovës, ku tre fëmijë të mitur humbën jetën pas shembjes së një objekti të vjetër.
Dy 15-vjeçarë dhe një 14-vjeçar ndodheshin brenda ndërtesës kur ajo u rrëzua, duke i zënë poshtë. Kreu i Policisë së Kosovës, Milazim Lumi, tha për mediat se objekti ishte një ndërtesë e pabanuar, e mbetur që nga lufta e vitit 1999.
Familjarët, të alarmuar nga mungesa e fëmijëve, i kërkuan për orë të tëra dhe arritën t’i lokalizonin përmes dridhjeve të telefonave të tyre. Pamjet e kamerave të sigurisë tregojnë se shembja ka ndodhur rreth orës 16:35, ndërsa trupat e viktimave u gjetën pas afro katër orësh kërkimesh.
Ngjarja ka shkaktuar reagime të shumta, me presidenten e Kosovës, Vjosa Osmani, që shprehu ngushëllime të thella për familjarët e viktimave, duke e cilësuar tragjedinë si të rëndë dhe të dhimbshme.
Kryetari i Kuvendit të Kosovës, Glauk Konjufca, dhe figura të tjera politike kanë kërkuar hetime të plota për të zbardhur shkaqet e ngjarjes dhe për të parandaluar tragjedi të tilla në të ardhmen.
Ndërkohë, kryetari i Gjakovës, Ardian Gjini, dhe ai i Prishtinës, Përparim Rama, shprehën gatishmërinë për të ndihmuar familjet e viktimave dhe për të marrë masa për sigurinë e objekteve të vjetra të rrezikshme.
