Tragjedi/ Rrëzohet avioni me 10 pasagjerë, asnjë i mbijetuar! Shuhet një familje me pesë anëtarë
Një avion i vogël tip Cessna 402C u rrëzua tragjikisht në një zonë rurale të komunës Urrao në Kolumbi, duke marrë jetën e të gjithë 10 pasagjerëve në bord. Avioni po udhëtonte nga Juardo, pranë kufirit me Panamanë, drejt Medellín.
Përpjekjet për të lokalizuar avionin nisën menjëherë pas raportimit të zhdukjes të mërkurën në mbrëmje, por moti i keq vështirësoi kërkimet. Trupat u gjetën pas dy ditësh nga ekipet e shpëtimit në një terren të vështirë pranë kodrës El Burro.
Mes viktimave ishte një familje pesëanëtarëshe: Raquel Palacios, Angie Sanclemente Palacios, Cristal Sofía Palaciosández, Greimar Castro Sanclemente, dhe Grettel Castro Sanclemente. Po ashtu humbën jetën pilotët e avionit, Santiago Montoya dhe Luis Guillermo Clavijo, si dhe pasagjerët Danny Moreno Culma, Miguelina García, dhe Yoarledis Valencia.
Sipas autoriteteve, shumica e pasagjerëve po ktheheshin në Medellín pas vizitave për festat e fundvitit. Guvernatori i rajonit, Andrés Julián Rendón, shprehu ngushëllimet për këtë tragjedi dhe theksoi dhimbjen e komunitetit për humbjen e jetëve.
Aksidenti po hetohet nga autoritetet për të zbuluar shkaqet e rrëzimit, ndërsa familjarët dhe miqtë e viktimave janë përfshirë në një dhimbje të thellë për humbjen e të dashurve të tyre.