Tragjedi në Teksas! 82 viktima dhe dhjetëra të zhdukur nga përmbytjet, mes tyre 28 fëmijë
Teksasi po përjeton një nga katastrofat natyrore më të rënda të dekadës, pasi përmbytjet e fuqishme që goditën shtetin të premten në mëngjes kanë shkaktuar të paktën 82 viktima, ndërsa 41 persona rezultojnë ende të zhdukur, mes tyre 28 fëmijë.
Pjesa më e madhe e jetëve të humbura janë raportuar në Qarkun Kerr, ku ndodhej Kampi Mystic, një destinacion i njohur veror për vajza, i vendosur buzë lumit Guadalupe. Përmbytja ndodhi kur lumi u rrit me 8 metra brenda vetëm 45 minutash, duke përfshirë të gjithë kampin, ndërsa kampistët ishin ende në gjumë.
Viktimat dhe të zhdukurit
Sipas autoriteteve vendore, mes viktimave ndodhen edhe:
-Drejtori i kampit, Richard “Dick” Eastland
-10 vajza dhe një këshilltar, ende të zhdukur
-Shumë prej fëmijëve ishin nga familje të komuniteteve të vogla rurale
Operacionet e kërkim-shpëtimit, ndër më të mëdhatë në historinë e Teksasit, janë duke kaluar gradualisht në fazën e rimëkëmbjes, ndërkohë që ekspertët paralajmërojnë stuhi të tjera brenda 24-48 orëve të ardhshme. Terreni i lagësht dhe i rrëshqitshëm, si dhe rreziku nga gjarpërinjtë helmues, po e vështirëson ndjeshëm punën e ekipeve të emergjencës.
Presidenti Donald Trump ka shpallur gjendjen e jashtëzakonshme në Qarkun Kerr, duke aktivizuar ndihmën federale. Ai deklaroi për mediat se mund të vizitojë zonën të premten. “Kjo është një tragjedi kombëtare. Familjet e prekura nuk do të jenë vetëm,” – u shpreh presidenti.
Ndërkohë, komuniteti vendas është mobilizuar, duke ofruar strehim të përkohshëm, ushqim dhe ndihmë mjekësore për qindra persona të evakuuar.
Pamjet që vijnë nga zona tregojnë rrugë të shkatërruara, shtëpi të rrënuara, automjete të përmbytura dhe pemë të rrëzuara, ndërsa shumë pjesë të Teksasit Qendror janë ende të izoluara. Autoritetet ende nuk e dinë saktësisht sa persona ndodheshin në kamp dhe në zonë në kohën e përmbytjeve, pasi fundjava e 4 Korrikut kishte sjellë një fluks të lartë turistësh.
View this post on Instagram