Tragjedi në Florida! U godit nga rrufeja gjatë muajit të mjaltit, ndërron jetë 29-vjeçari
Një ngjarje tragjike ka ndodhur në shtetin e Floridës, SHBA, ku një 29-vjeçar humbi jetën pasi u godit nga rrufeja gjatë muajit të tij të mjaltit. Viktima është identifikuar si Jake Rosencrantz, i cili po shijonte pushimet bashkëshortore në plazhin New Smyrna, një nga destinacionet e njohura turistike të rajonit.
Sipas autoriteteve lokale, Rosencrantz ndodhej në det në momentin që u godit nga rrufeja. Ai u transportua menjëherë në spital në gjendje kritike, por për fat të keq ndërroi jetë të nesërmen në mëngjes, pavarësisht përpjekjeve të vazhdueshme të mjekëve për ta mbajtur në jetë.
Lajmi u konfirmua fillimisht nga Sherifi i Qarkut Volusia, Mike Chitwood, i cili përmes një postimi në rrjetin social Facebook shprehu dhimbjen e tij për ngjarjen:
“Po lutem për këtë të ri dhe gruan e tij. Ata erdhën në plazhet tona për të festuar martesën e tyre. Dhe në një sekondë, gjithçka ndryshoi. Zemra ime është me ta sonte.”
Të hënën, pas konfirmimit zyrtar të vdekjes së 29-vjeçarit, Sherifi Chitwood u shpreh sërish publikisht:
“Ngushëllimet e mia të sinqerta për humbjen tragjike të një të riu që ishte këtu në muajin e mjaltit me gruan e tij. I dërgojmë ngushëllimet tona të sinqerta bashkëshortes së tij në emër të të gjithëve ne në Qarkun Volusia, të cilët shpresonin deri në momentin e fundit se përpjekjet e shpëtimtarëve do ta sillnin atë përsëri në jetë.”