Një avion pasagjerësh me 10 persona në bord, përfshirë nëntë pasagjerë dhe një pilot, është zhdukur në Alaska. Avioni ishte nisur nga komuniteti i largët i Unalakleet drejt Nome dhe humbi kontaktin rreth orës 16:00, sipas Departamentit të Sigurisë Publike të Shtetit.
Linja ajrore Bering Air deklaroi se komunikimi me avionin Caravan Cessna u ndërpre më pak se një orë pas ngritjes. Autoritetet dhe ekipet e shpëtimit janë në kërkim të avionit, ndërsa moti i keq dhe dukshmëria e ulët po vështirësojnë operacionet.
“Ekuipazhet janë ende në terren, duke kontrolluar sa më shumë zonë të jetë e mundur,” bëri të ditur departamenti të premten në mëngjes. David Olson, drejtori i operacioneve të Bering Air, konfirmoi se ekipi po punon intensivisht për të mbledhur informacione dhe për të koordinuar ndihmën emergjente.
Departamenti i Zjarrfikësve Vullnetar i Nome po kryen kërkime tokësore rreth Malit të Bardhë, ndërsa për shkak të kushteve atmosferike të vështira, kërkimi ajror është i kufizuar. Autoritetet u kanë bërë thirrje banorëve të mos organizojnë kërkime private, pasi moti është tepër i rrezikshëm dhe mund të rrezikojë jetën e tyre.
Operacionet e kërkimit dhe shpëtimit janë ende në zhvillim, ndërsa familjarët e personave në bord janë në pritje të informacioneve të reja.