Theu masën “arrest në shtëpi” për të shitur drogë, arrestohet 41-vjeçari në Tiranë
Policia e Tiranës ka finalizuar operacionin e koduar “All included”, duke arrestuar në flagrancë shtetasin E. S., 41 vjeç, i cili kishte thyer masën e sigurisë “arrest në shtëpi” për t’u marrë me shitje droge.
Gjatë kontrollit fizik dhe në banesën e tij, shërbimet e policisë gjetën dhe sekuestruan:
•103 gramë kokainë të ndarë në doza për shitje
•23 000 lekë dhe 940 euro, të dyshuara si të ardhura nga trafiku i drogës
•1 armë të ftohtë, municion luftarak, një bllokues valësh dhe një radio policie
41-vjeçari u kap jashtë banesës, duke shkelur vendimin e Gjykatës, e cila e kishte dënuar më herët për veprën penale “Prodhimi dhe shitja e narkotikëve”. Materialet procedurale i kaluan Prokurorisë së Tiranës për veprime të mëtejshme.