Tabaku kritika të forta qeverisë: Nuk mund të sillemi si europianë në Bruksel dhe si autokratë në Tiranë

Kryetarja e Komisionit të Çështjeve Europiane, Jorida Tabaku, ka goditur me kritika të ashpra qeverinë gjatë mbledhjes së komisionit për diskutimin e Pozicioneve Negociuese me Bashkimin Europian. Tabaku theksoi se qeveria nuk mund të vazhdojë të mbajë një fasadë europianizimi në Bruksel, ndërkohë që në vend, sipas saj, shkel standardet demokratike.

“Po diskutojmë për grupkapitullin 4 që është shumë i rëndësishëm për mjedisin, energjinë dhe ndërlidhjen, por nuk mund të injorojmë faktin që sapo kemi dalë nga një proces zgjedhor me probleme të thella. Ky është kapitulli themelor – ai i zgjedhjeve dhe sundimit të ligjit. Dhe për fat të keq, testi demokratik dështoi,” deklaroi Tabaku në nisje të fjalës së saj.

Duke iu referuar raportit të OSBE-ODIHR mbi zgjedhjet e 11 majit, Tabaku e cilësoi dokumentin si një “akt-ekspertimi që vulos realitetin e një shteti që vepron në shërbim të një partie”. Ajo nënvizoi se raporti nxjerr në pah shkrirjen e vijës ndarëse mes shtetit dhe partisë, përdorimin e të dhënave personale të qytetarëve për qëllime elektorale dhe presionin e ushtruar mbi administratën publike për të shërbyer si makineri elektorale.

“Ne nuk mund të sillemi si europianë në Bruksel dhe si shqiptarë në Tiranë. Nuk mund të firmosim kapituj në letër kur po mbyllim sytë përballë deformimit të vullnetit të qytetarëve,” u shpreh ajo me tone të forta.

Tabaku theksoi se integrimi europian nuk është thjesht një proces teknik dhe burokratik, por një kontratë politike mes qeverisë dhe qytetarëve. “Raporti i OSBE-ODIHR është dëshmi e dështimit të kësaj kontrate. Qeveria duhet të përballet me këtë realitet dhe të marrë përgjegjësinë për standardet e zgjedhjeve,” tha Tabaku.

Gjatë mbledhjes nuk munguan as përplasjet. Deputetja Mimi Kodheli kundërshtoi qasjen e Tabakut, duke thënë se këto shqetësime nuk ishin objekt diskutimi në këtë mbledhje. Por Tabaku reagoi menjëherë: “Jam këtu për të shprehur mendimin tim politik. Ndoshta nuk ju pëlqen, por duhet të respektojmë njëri-tjetrin.”

Pjesë nga fjala e Jorida Tabakut:

Sot diskutojmë për një nga grupkapitujt më të rëndësishëm në procesin e integrimit: Clusteri 4 – që përfshin politikat e mjedisit, klimës, energjisë dhe ndërlidhjes. Të gjitha këto janë fusha që prekin drejtpërdrejt jetën e qytetarëve shqiptarë dhe që lidhen ngushtësisht me modelin ekonomik dhe shoqëror që ne duam të ndërtojmë në të ardhmen.
Por, nuk duhet të harrojmë se ky diskutim zhvillohet vetëm pak javë pas një procesi zgjedhor, i cili testoi jo vetëm vullnetin e qytetarëve, por edhe qëndrueshmërinë e institucioneve tona demokratike. Dhe nëse integrimi europian ka një themel të padiskutueshëm, ai është pikërisht sundimi i ligjit dhe zgjedhjet e lira.

Ne po diskutojmë për grupkapitullin 4 që është shumë i rëndësishëm për mjedisin, për ndërlidhjen, për energjinë dhe që prekin qytetarët. Por, nuk duhet të harrojmë që jemi në një pikë kthese pasi jemi pas zgjedhjeve dhe kemi testuar se si kjo qeveri sillet me themeloret – pra me kapitullin e zgjedhjeve dhe sundimin e ligjit.

Ky është kapitulli që hapet i pari dhe mbyllet i fundit për nga rëndësia që ka. Dhe një vlerësues i këtij progresi është padyshim raporti i OSBE-ODIHR, që në versionin e tij paraprak flet hapur për abuzimin me pushtetin dhe për zhdukjen e vijës ndarëse mes shtetit dhe partisë.

Ne nuk mund të sillemi si europianë në Bruksel dhe si shqiptarë në Tiranë. Qeveria duhet të sigurojë uniformitet në zbatimin e detyrave. Ne kemi nevojë për një diskutim të thellë institucional për procesin zgjedhor, pasi nuk mund të heshtë Tirana.