Sulmet Izrael-Iran! Thellohet bilanci, shkon në 1481 numri i viktimave në Teheran

Përshkallëzimi i dhunës mes Izraelit dhe Iranit ka sjellë pasoja të rënda humanitare në Teheran, ku sipas të dhënave zyrtare bilanci i viktimave vazhdon të rritet. Hossein Kermanpour, zëdhënës i Ministrisë së Shëndetësisë së Iranit, ka bërë me dije se numri i përgjithshëm i të vdekurve dhe të plagosurve ka arritur në 1,481 persona pas 65 orëve të bombardimeve të pandërprera nga Forcat Ajrore izraelite.

“Në total, 1,481 individë janë vrarë ose plagosur në sulmet izraelite gjatë 65 orëve të fundit. Nga këta, 1,277 persona janë shtruar në spital në qendrat mjekësore të lidhura me universitetet e vendit, me mbi 90% të viktimave që janë civilë. Deri më tani, 522 individë janë liruar nga spitali, ndërsa 224 burra, gra dhe fëmijë kanë humbur jetën si pasojë e sulmeve,” deklaroi Kermanpour në një prononcim për mediat.

Ai theksoi se shumë prej të plagosurve ndodhen në gjendje kritike dhe numri i viktimave mund të rritet më tej. Ministria e Shëndetësisë e Iranit ka dënuar ashpër veprimet e Izraelit, duke i cilësuar ato si agresion i pamëshirshëm dhe që shkel normat më bazë të së drejtës ndërkombëtare dhe humanitare.

“Kostoja njerëzore e këtyre sulmeve bie ndesh qartë me pretendimet për ‘shënjestër të saktë’ dhe nënvizon natyrën pa dallim të agresionit izraelit,” thuhet në deklaratën zyrtare të ministrisë.

Sulmet e vazhdueshme kanë shkaktuar dëme të mëdha materiale në infrastrukturën civile, ndërtesa qeveritare dhe objekte publike, duke përkeqësuar më tej situatën e sigurisë dhe atë humanitare në kryeqytetin iranian. Shumë familje janë zhvendosur nga shtëpitë e tyre dhe ndihmat humanitare po shpërndahen me vështirësi për shkak të bombardimeve të herëpashershme.