Stuhia e fuqishme paralizon Aeroportin e Budapestit, pezullohen përkohësisht udhëtimet
Një stuhi e fuqishme ka goditur sot Aeroportin Ndërkombëtar Ferenc Liszt të Budapestit, duke shkaktuar dëme të konsiderueshme dhe ndërprerje të përkohshme të udhëtimeve ajrore.
Sipas deklaratës së operatorit të aeroportit, pistat u mbushën me mbeturina, ndërsa uji i shiut hyri në ndërtesën e terminalit, duke detyruar autoritetet të ndërpresin përkohësisht fluturimet për arsye sigurie.
“Për shkak të mbeturinave në pista, ato janë mbyllur për arsye sigurie dhe udhëtimet në aeroport janë pezulluar përkohësisht”, thuhet në deklaratën zyrtare.
Administrata e aeroportit bëri të ditur se reshjet e dendura kanë depërtuar përmes tavanit të sallës së nisjeve në Terminalin 2A, duke detyruar evakuimin e saj. Procedurat e regjistrimit të pasagjerëve janë zhvendosur përkohësisht në Terminalin 2B.
Fatmirësisht, pavarësisht dëmeve materiale, nuk raportohet për persona të lënduar.