Skënderbeu shkëlqen ndaj Tiranës dhe kualifikohet në finalen e madhe pas më shumë se 35 vitesh
Skënderbeu i volejbollit për meshkuj ka arritur një sukses historik, duke u kualifikuar në finalen e kampionatit kombëtar pas më shumë se 35 vitesh. Skuadra korçare fitoi ndeshjen e tretë dhe vendimtare të gjysmëfinales kundër Tiranës, duke siguruar një vend përballë Partizanit në finalen për titullin kampion.
Takimi i zhvilluar në një atmosferë elektrizuese u dominua në pjesën më të madhe nga korçarët, të cilët triumfuan në dy setet e para me rezultatin identik 25-22. Tirana reagoi në setin e tretë, duke e fituar atë me shifrat 25-23 dhe duke mbajtur gjallë shpresat për përmbysje. Por Skënderbeu nuk lejoi më surpriza, duke e mbyllur takimin me një set të katërt të shkëlqyer, fituar bindshëm 25-16.
Me këtë fitore 3-1 në ndeshjen e tretë, Skënderbeu mbyll serinë gjysmëfinale me shifrat 2-1 dhe bën një rikthim të madh në finalen e kampionatit, aty ku do të përballet me skuadrën e Partizanit, që siguroi finalen pas dy fitoreve radhazi ndaj Erzenit.
Për korçarët, kjo është një arritje historike dhe një mundësi e artë për të rikthyer titullin kampion në qytetin juglindor, pas më shumë se tri dekadash pritjeje.
View this post on Instagram