Altin Basha, drejtori i Teatrit Kombëtar, është shkarkuar sot nga detyra me vendim të Këshillit të Ministrave. Ky veprim erdhi pas publikimit të një investigimi të emisionit “Piranja”, i cili zbuloi abuzime të rënda me fondet e këtij institucioni.
Sipas investigimit, Altin Basha dhe bashkëshortja e tij, Iliriana Basha, dyshohet se kanë përfituar fonde në mënyrë të padrejtë, duke i përdorur ato për qëllime personale. Në qendër të këtij skandali është shfaqja “Vojçek”, ku është raportuar për abuzime me fondet e destinuara për kostumet dhe realizimin e saj.
Në përballjen me gazetarët e “Piranjave”, Altin Basha refuzoi të jepte sqarime konkrete, duke kërkuar që çështja të trajtohej në një takim zyrtar pranë Teatrit Kombëtar. Ndërkohë, bashkëshortja e tij ka mohuar çdo përfshirje në abuzim fondesh.
Shkarkimi i Bashës shënon një përpjekje për të kthyer transparencën në institucionin e Teatrit Kombëtar. Ndërkohë, emri i pasardhësit të tij në këtë post pritet të bëhet i ditur në ditët në vijim.
Autoritetet po hetojnë më tej mbi këtë çështje për të zbardhur plotësisht skemën e dyshuar të abuzimit dhe përgjegjësinë e personave të përfshirë.