“S’kam lidhje me asnjë grup kriminal”/ Kryebashkiaku i Malësisë së Madhe, paraqitet në SPAK, ja çfarë deklaron
Kryebashkiaku i Malësisë së Madhe, Tonin Marinaj, ka paraqitur sot vetveten për të dhënë një dëshmi në Prokurorinë e Posaçme Kundër Korrupsionit dhe Krimit të Organizuar (SPAK), ku qëndroi për rreth dy orë. Pas mbylljes së takimit me prokurorët, Marinaj ka reaguar para gazetarëve, duke mohuar çdo lidhje me grupe kriminale dhe hedhur poshtë akuzat që e lidhin me veprimtari të paligjshme.
“Nuk jam i përfshirë në asnjë grup kriminal. Më vjen keq që po shpërndahen këto mashtrime. Nuk jam në hetim,” u shpreh Marinaj, duke theksuar se të gjitha akuzat janë të pabaza dhe se nuk ka asnjë lidhje me aktivitete kriminale.
Kujtojmë se më 2 korrik të vitit 2024, një grup deputetësh të Partisë Demokratike dorëzuan një kërkesë në SPAK, ku kërkonin verifikimin e kryebashkiakut Tonin Marinaj, duke nënvizuar dyshimet dhe të dhënat faktike që sugjeronin se ai kishte qenë më parë i përfshirë dhe drejtonte një grup kriminal që operonte në trafikimin e lëndëve narkotike në Itali. Deputetët e PD kërkuan një hetim të thelluar për të verifikuar këto akuza dhe për të siguruar që Marinaj nuk kishte ndonjë lidhje me aktivitetet e paligjshme.
Marinaj ka reaguar ndaj këtyre akuzave duke i quajtur ato si përpjekje për ta dëmtuar dhe për të krijuar dyshime të pabaza rreth integritetit të tij.