Për herë të parë në historinë e Shqipërisë, në Tiranë do të luhet për titullin kampion Europe në boks, në peshën Zeus të boksit Heavy Wheight!
Kampioni kuqezi, Nelson Hysa do të sfidohet me Thorsten Fuchs për titullin International (IBO).. Dyshja vijnë në këtë ndeshje pa asnjë humbje. Rekordi i gjigantit nga Shkodra është 17 fitore në 17 ndeshje në boksin profesionist, prej të cilave 15 me knockout, ndërsa Fuchs ka 13 fitore në 13 takime.
“ Kam arritur 17 fitore dhe kërkoj të 18-tën përballë Fuchs, në një ndeshje historike për kombin tonë. Ndihem i vlerësuar, që për herë të parë në Shqipëri luaj për titullin e Europës. Pas 24 vitesh, tani kam arritur në kulmin e karrierës time. Luftoj për një titull shumë të rëndësishëm, jam përgatitur shumë për këtë ndeshje. Është një kundërshtar shumë i fortë, por e kam studiuar mirë së bashku me stafin tim, i cili është një ndihmë e madhe. Interesi është shumë i madh për këtë ndeshje nga tifozët. Do të ketë shumë shkodranë që do të vijnë në Tiranë, por nga e gjithë Shqipëria sepse për herë të parë në histori do të luhet për një titull International (IBO)”, tha Nelson Hysa në konferencën për shtyp.
Ndeshja e dytë e madhe e mbrëmjes do të jetë për kampionin e Globit. Alban Bermeta me 16 fitore sfidon nigerianin Obinna Joseph me 23 fitore, të gjitha të mbyllura me knockout. Duhet theksuar fakti se këto 2 tituj në një mbrëmje boksi nuk janë zhvilluar kurrë në Ballkan.
Në ring do të ngjitet edhe Denis Nurja, kampioni i Ballkanit (15 fitore, 11 me knockout) përballë kampionit të Venezuelës Angel Barroso. Gjithashtu në ring do të ngjitet edhe kampioni i shumëfishtë Arjon Kajoshi, pas tij boksieri kampion nga Durrësi, Ardit Murja, i cili do të ketë një kundërshtar shumë të fortë, si dhe talenti Xhuzepe Jaka dhe Fabio Kaciu, e ardhmja e peshave të rënda në Shqiperi (4 ndeshje 4 fitore me knockout).
Interesi është i jashtëzakonshëm, dhe i gjithë eventi do të transmetohet live nga 2 televizione botërore si DAZN dhe ESPN. Sfida që do të zhvillohen mbrëmjen e 11 korrikut në sheshin “Skënderbej”, duke nisur nga ora 19:00.