Policia e Durrësit ka finalizuar operacionin “Cleaning 2”, duke shkatërruar një grup kriminal që shiste lëndë narkotike dhe kryente vjedhje. Gjashtë shtetas janë arrestuar, përfshirë dy të shpallur në kërkim, dhe janë sekuestruar doza kokaine, kanabis, 6 celularë dhe 94 shezlongë të vjedhur.
Të arrestuarit janë Fabion Masha, Ahmet Isufi, Lulzim Rubjeka, Alin Gjuzi, Sentiljano Selami dhe Fation Xhezairi. Në momentin e arrestimit, tre nga ata u kapën me lëndë narkotike. Gjithashtu, dy të tjerë dyshohet se kanë vjedhur çadra dhe shezlongë, që më pas i shisnin në dyqane.
Materialet e sekuestruara përfshijnë gjithashtu një peshore elektronike dhe sasi të tjera të dyshuar si narkotikë. Policia vijon hetimet dhe operacionet për goditjen e grupeve kriminale të lidhura me narkotikët dhe vjedhjet.