Rriten rastet e infeksioneve nga virusi hMPV në Mbretërinë e Bashkuar dhe në botë, ja çfarë theksojnë ekspertët: Nuk është si Covid-19

Rastet e virusit human metapneumovirus (hMPV) kanë shënuar rritje në Mbretërinë e Bashkuar, ndërsa raportimet për një shpërthim të mundshëm në Kinë kanë nxitur vëmendjen globale.

Sipas të dhënave të publikuara nga autoritetet shëndetësore, infeksionet kanë qenë në rritje gjatë dhjetorit dhe pritet të vijojnë të shtohen në javët e ardhshme. Në fund të vitit 2024, niveli i aktivitetit të virusit është vlerësuar si “mesatar”, ndërsa rastet pozitive janë rritur pak në 4.5%, në përputhje me trendet e viteve të kaluara.

Profesor Paul Hunter, ekspert në mjekësi në Universitetin e Anglisë Lindore, tha:

“Anglia ka parë një rritje të ndjeshme në javët e fundit. Përqindja e rasteve pozitive deri tani është pak më e lartë se kjo periudhë vitin e kaluar, por pa ndonjë ndryshim të madh, përveçse nëse normat e infeksionit vazhdojnë të rriten.”

Në Kinë, autoritetet kanë raportuar një rritje të rasteve te fëmijët nën 14 vjeç. Pamje të pacientëve në spitale me sisteme IV dhe dhoma pritjeje të mbushura kanë qarkulluar online, duke rikujtuar plagët e pandemisë. Rastet janë raportuar gjithashtu në Indi, Kazakistan dhe Malajzi.

Megjithatë, autoritetet britanike kanë nënvizuar se hMPV nuk ka asnjë lidhje me Covid-19 dhe është një virus i njohur prej dekadash, i zbuluar për herë të parë në Holandë.

Profesor Sir Andrew Pollard, drejtori i Grupit të Vaksinave në Oksford, tha:

“Raportimet për infeksionet respiratore në Kinë ditët e fundit lidhen si me gripin, ashtu edhe me virusin human metapneumovirus. Situata është e ngjashme edhe në Mbretërinë e Bashkuar këtë javë.”

Në vitin 2024, Shërbimi Kombëtar Shëndetësor (NHS) në Britani prezantoi një vaksinë kundër virusit të ngjashëm RSV, ndërsa vaksina të reja që mund të mbrojnë nga RSV dhe hMPV në një dozë të vetme janë në zhvillim.