Raporti 2024, IOM: 40% e fuqisë punëtore është larguar nga vendi, shkak diferencat e pagave midis Shqipërisë dhe rajonit
Në raportin e vitit 2024 të Organizatës Ndërkombëtare të Migracionit (IOM), thuhet se rreth 40% e fuqisë punëtore të Shqipërisë ka emigruar jashtë vendit. Kjo ka ndodhur për shkak të faktorëve të ndryshëm, përfshirë diferencat e pagave midis Shqipërisë dhe vendeve të tjera të rajonit, mungesën e mundësive të punësimit, pagat e ulëta, normat e larta të varfërisë dhe korrupsionin.
Raporti thekson se Shqipëria dhe Moldavia janë dy nga vendet më të goditura nga largimi i fuqisë punëtore. Ky fenomen ka shkaktuar një “ikje të trurit”, duke ushtruar presion mbi ekonominë dhe industrinë vendase, e cila po humbet vazhdimisht punëtorë, sidomos në sektorët me kualifikim të ulët dhe atyre që kërkojnë punëtorë me kualifikim të lartë.
Raporti përmend gjithashtu udhëtimet e vështira që kanë ndërmarrë mijëra të rinj shqiptarë, të cilët kanë rrezikuar jetën e tyre për të arritur në Evropën Veriore, kryesisht në Mbretërinë e Bashkuar, duke kaluar Kanalin Anglez në varka të vogla dhe gomone. Ky fenomen ka ndikuar gjithashtu në sektorë të tillë si turizmi, bujqësia dhe shërbimet, ku fuqia punëtore është duke rënë vazhdimisht.