Rama nis Programin Kombëtar të Strehimit Social: 1,253 familje në 35 bashki drejt një jete më të denjë
Kryeministri Edi Rama ka prezantuar sot Programin Kombëtar të Strehimit Social, një ndërhyrje që, sipas tij, është “si asnjëherë më parë” në mbështetje të familjeve në nevojë. Përmes një postimi në rrjetet sociale, kreu i qeverisë bëri të ditur se plot 1,253 familje në 35 bashki të vendit do të përfitojnë nga ky projekt i rëndësishëm.
Programi synon përmirësimin e kushteve të banimit, të infrastrukturës përreth dhe aksesit në shërbime jetike për këto familje. Zbatimi i projektit pritet të nisë në muajt korrik-gusht 2025 dhe do të zgjasë dy vite, duke sjellë një ndryshim domethënës në jetesën e shtresave më të pambrojtura të shoqërisë.
“Kjo është një ndërhyrje konkrete për të ofruar një jetë më të denjë për shtresat në nevojë,” theksoi Rama, duke e cilësuar programin si një hap të rëndësishëm për përmirësimin e standardeve të jetesës në komunitete të ndryshme të vendit.