Në një deklaratë për mediat pas përfundimit të mbledhjes së qeverisë, ministri i Ekonomisë Blendi Gonxhe, ka folur në lidhje me indeksimin e pensioneve. Ai u shpreh se synim i indeksimit është të ruhet fuqia blerëse dhe sfidë për qeverinë mbetet rritja e pensioneve, diskutimi për të cilin do të nisë në mes të muajit tetor.
“Vendimi i qeverisë për indeksimin e pensioneve 4.1 përqind. Nis me pagesat e muajit tetor. Përfitojnë 791 257 pensionistë, sipas numrit aktual të ndarë në këto dy kategori, pensione nga skema e detyrueshme dhe pensione nga programe e trajtime të veçanta si ushtarakët apo punonjësit e minierave. Sa i përket indeksimit të pensioneve, efektet llogaritet në 1.693 milion vetëm për tre muajt e 2024
Synim i indeksimit është të ruhet fuqia blerëse. Qeveria i ka në fokus, sfidë që të rrisim të ardhurat e pensionistëve që të kemi një jetë sa më të denjë për ta. Po studiojmë mënyrat që të kemi një rishikim të skemës dhe mundësive për të patur një rritje, duke nisur me rritjen e bonusit të fundvitit. Në mes të tetorit nis një proces ku do të shihet rishikimi i pensioneve”, u shpreh ai.
Po kështu, ministri Gonxhe foli edhe për shpërblimet për pensionistët në fund të vitit, ndërsa nga muaji Janar do të ketë një skemë të re pensionesh për të cilën ende është duke u punuar. Skema e re e pensioneve synon të rrisë ato minimale.