Po krijohet vaksina kundër Murtajës së Zezë, ekziston frika se kjo sëmundje mund të rishfaqet

Shkencëtarët që zhvilluan vaksinën AstraZeneca kundër COVID-19 po punojnë për një vaksinë të re për të luftuar Murtajën e Zezë, mes frikës në rritje se kjo sëmundje mund të kthehet.

Murtaja e Zezë mbërriti për herë të parë në Britani në vitin 1348, pasi u përhap në Evropë nga pleshtat që jetonin mbi minjtë në anijet që vinin nga Azia.

Shkencëtarët vlerësojnë se një e treta deri në gjysma e popullsisë së Britanisë humbi jetën nga Murtaja e Zezë brenda vitit pasardhës.

Në raste të përsëritura gjatë shekujve, më shumë se 200 milionë njerëz kanë humbur jetën nga kjo sëmundje, e cila konsiderohet një nga më vdekjeprurëset në histori.

Shkencëtarët frikësohen se murtaja, e cila ende ekziston në disa pjesë të botës, ka “potencial për përhapje pandemike” në të ardhmen.

Shkencëtarët nga Laboratori i Shkencës dhe Teknologjisë së Mbrojtjes në Porton Down shkruan vitin e kaluar se rezistenca antimikrobike po krijon lloje super-bakteresh që nuk mund të trajtohen me antibiotikë standardë.

Tani, ekipi pas vaksinës Oxford AstraZeneca ka njoftuar se po bëjnë përparime në një vaksinë të re që mund të ndalojë zhvillimin e murtajës.

Vaksina e re u testua te 40 të rritur të shëndetshëm dhe ka rezultuar e sigurt dhe e aftë për të prodhuar një përgjigje imune ndaj kësaj sëmundjeje shpesh vdekjeprurëse.

Drejtori i grupit të zhvillimit të vaksinës, Profesor Sir Andrew Pollard, tha:

“Nuk ka vaksina të licencuara kundër murtajës në Mbretërinë e Bashkuar. Antibiotikët janë i vetmi trajtim. Ka disa vaksina të licencuara në Rusi. Rreziku në Mbretërinë e Bashkuar aktualisht është shumë i ulët. Pandemitë historike me mortalitet të lartë lidheshin me përhapjen nga pleshtat në brejtës, por përhapeshin nga personi te personi.”

Ekspertë globalë do të shqyrtojnë rezultatet e testeve të kryera nga shkencëtarët përpara se të kryhen prova të tjera më vonë gjatë këtij viti.

AstraZeneca njoftoi për herë të parë se kishin “gjetur formulën fituese” me vaksinën e tyre me dy doza kundër COVID-19 të Universitetit të Oksfordit në dhjetor 2020.

Vetëm disa ditë më vonë, Mbretëria e Bashkuar miratoi përdorimin emergjent të kësaj vaksine për të luftuar virusin.

Vlerësohet se vaksina shpëtoi 6.3 milionë jetë brenda vitit të saj të parë të përdorimit.