Robert Gjika 32 vjeç është ekstraduar nga Greqia në Shqipëri. Ndaj këtij të fundit GJKKO ka caktuar këtë vit masën e “arrestit me burg” për “ndihmë në kalimin ilegal të kufijve”, kryer në formën e grupit të strukturuar kriminal.
Sipas Policisë, i riu dyshohet si pjesëtar i një grupi kriminal që akuzohet se transporton emigrant në mënyrë të paligjshme, kryesisht në Britaninë e Madhe. “Shtetasi i ekstraduar në Shqipëri iu dorëzua Drejtorisë së Përgjithshme të Burgjeve”, thuhet në njoftimin zyrtar.3 vite më parë Gjika ka plagosur një person në Kuçovë.
NJOFTIMI I PLOTE:
Në vijim të bashkëpunimit me homologët, për kapjen dhe ekstradimin e shtetasve të shpallur në kërkim ndërkombëtar, u ekstraduan:
-nga Greqia në Shqipëri, shtetasi R.Gj, 32 vjeç, i lindur në Berat. Në vitin 2024, GjKKO-ja i ka caktuar këtij shtetasi, masën e sigurisë “Arrest në burg”, për veprën penale “Ndihma për kalim të paligjshëm të kufijve”, kryer në formën e grupit të strukturuar kriminal. Ky shtetas dyshohet si pjesëtar i një grupi kriminal që akuzohet në kuadër të megaoperacionit “NOMADA”, se ka transportuar ilegalisht, emigrantë, kryesisht në Britani të Madhe;
-nga Shqipëria në Turqi, shtetasi turk i shpallur në kërkim ndërkombëtar Mehmet Akman, 50 vjeç. Gjykata e Lartë e Stambollit e ka dënuar këtë shtetas, me 10 vjet burgim, për veprën penale “Trafik i narkotikëve”, si dhe Gjykata e Lartë e Bakirkoy e ka dënuar me 7 vjet e 2 muaj burgim, për veprën penale “Prodhimi dhe shitja e lëndëve narkotike”, parashikuar nga Kodi Penal i Turqisë.
Shtetasi i ekstraduar në Shqipëri iu dorëzua Drejtorisë së Përgjithshme të Burgjeve.