Përmbyllet me sukses pas pesë ditësh, misioni i shuarjes së zjarreve në Shqipëri/ Pirro Vëngu: Ky mision ishte një shembull i shkëlqyer i solidaritetit evropian

Përmbyllet me sukses pas një përpjekjeje intensive prej pesë ditësh, misioni i shuarjes së zjarreve në Shqipëri. Dy avionët ushtarakë rumunë, të tipit C-27J Spartan dhe C-130 Hercules, të cilët u angazhuan në këtë mision në kuadër të Mekanizmit Evropian të Mbrojtjes Civile, kanë dhënë një kontribut të jashtëzakonshëm në luftën kundër flakëve që kishin përfshirë disa nga zonat më të rrezikuara të vendit tonë.

Gjatë këtyre ditëve, avionët rumunë kanë kryer dhjetëra fluturime mbi disa nga vatrat më të nxehta të zjarrit. Përpjekjet e tyre kanë qenë vendimtare për të ndaluar dëmet e mëtejshme. Gjatë gjithë misionit në Shqipëri, avioni rumun kreu gjithsej 23 hedhje, duke përdorur një total prej 141,000 litrash uji në zonat e: Liqenit të Prespës, Malit të Tomorrit, në fshatin Nënshetaj, në Orosh të bashkisë Mirditë, në Fushë Bulqizë dhe në fshatin Arrën në Bashkinë e Kukësit.

“Ky mision ishte një shembull i shkëlqyer i solidaritetit evropian dhe bashkëpunimit ndërkombëtar në momente kritike. Ndihma e dhënë nga Rumania dhe Mekanizmi Evropian i Mbrojtjes Civile ka qenë e paçmueshme për menaxhimin e situatës emergjente në vendin tonë,” tha ministri Vengu.

Edhe Agjencia Kombëtare të Mbrojtjes Civile ka luajtur një rol kyç në koordinimin dhe mbështetjen e operacionit në terren. I pranishëm në këtë aktivitet Ambasadori rumun në Shqipëri, Oktavian Serban, falënderoi Bashkimin Evropian për vendimin që morën për të ndërhyrë si dhe trupat shqiptare për punën e tyre në luftën me zjarret dhe bashkëpunimin shumë të mirë. Avionët rumunë, që prej datës 14 gusht iu bashkuan përpjekjeve të Forcave të Armatosura dhe autoriteteve të tjera lokale për përballimin e situatës së krijuar nga zjarret.