Jozi, një nga banorët më të komentuar të Big Brother VIP 4, është përjashtuar sot me zarf të zi pas debatit të ashpër që pati me Gjestin, gjatë të cilit i drejtoi këtij të fundit fjalët “kopil shkjau”. Pas përjashtimit, Jozi foli për herë të parë në emisionin “Shqipëria Live” në Top Channel, duke shprehur pendesë për krahasimin e përdorur, por sqaroi se nuk i ishte drejtuar personalisht Gjestit.
Jozi pranoi se krahasimi që bëri ishte i tepruar, por shtoi se nuk ishte me qëllim të keq. Sipas tij, Gjesti u viktimizua për situatën dhe e përdori këtë kundër tij.
“Nuk ia thash aspak personit në fjalë ose me tendencën e asaj historie të rëndë që kemi. Më vjen keq që jam përjashtuar. Është një krahasim i tepërt, e pranoj, por nuk është i drejtuar ndaj Gjestit direkt. Më vjen keq për Lorin, Bonën dhe Aldon. Thjesht mendoj se vetëm një person pa gjak shqiptari nuk di të kërkojë falje,” u shpreh Jozi.
Gjatë intervistës, Jozi deklaroi se ai është personi që mund të përfaqësojë më mirë shqiptarët e Kosovës në krahasim me Gjestin. “Shqiptarët e Kosovës i dua unë më shumë se Gjesti dhe mund të tregoj shembullin më të mirë për ta. Ai që mund t’i përfaqësojë kosovarët jam unë,” theksoi ai.
Debati i ashpër mes Jozit dhe Gjestit ka shkaktuar një reagim të fortë në publik dhe rrjete sociale, duke ndarë opinionin e fansave. Përjashtimi i Jozit u konsiderua i pashmangshëm nga Vëllai i Madh për shkak të komenteve të tij, të cilat shkelën rregullat e etikës së programit.