Parlamentaret në Kosovë/ Vetëvendosja humbi 20 mijë vota, ja si ndryshoi rezultati krahasuar me zgjedhjet e vitit 2021
Në zgjedhjet parlamentare të së dielës, qytetarët e Kosovës iu drejtuan qendrave të votimit për të vendosur për partitë që do të drejtojnë vendin në periudhën e ardhshme. Sipas rezultateve të deritanishme, Lëvizja Vetëvendosje (VV) e kryeministrit Albin Kurti është ende në krye, por me një humbje të dukshme të mbështetjes krahasuar me zgjedhjet e vitit 2021.
Në Prishtinë, VV-ja ka marrë 46.80% të votave, ose mbi 51 mijë vota, duke humbur rreth 20 mijë vota në krahasim me 71 mijë votat që mori në zgjedhjet e vitit 2021, ku fitoi më shumë se 65% të votave. Përkundrazi, Partia Demokratike e Kosovës (PDK) dhe Lidhja Demokratike e Kosovës (LDK) kanë regjistruar rritje të mbështetjes, veçanërisht në kryeqytet.
LDK-ja ka arritur 25.54% të votave, me mbi 28 mijë vota, duke fituar 11 mijë vota më shumë se në zgjedhjet e 2021. Po ashtu, PDK-ja ka marrë mbi 20 mijë vota, ose 8 mijë më shumë se në zgjedhjet e katër vjetëve më parë.
Kjo rritje e mbështetjes për PDK-në dhe LDK-në ka sjellë një ndryshim të rëndësishëm në peizazhin politik të Kosovës, duke pasqyruar ndoshta një ndryshim në preferencat e qytetarëve për partitë tradicionale, ndërsa VV-ja do të ketë sfida të tjera për të mbajtur udhëheqjen.