Panik në ajër! Avioni i United Airlines bën ulje emergjente pas turbulencave të forta, 6 pasagjerë të plagosur
Një avion i linjës ajrore United Airlines, i cili udhëtonte nga Nigeria drejt Shteteve të Bashkuara, u detyrua të kryente një ulje emergjente për shkak të turbulencave të forta, duke shkaktuar lëndime të lehta për gjashtë persona.
Turbulencat dhe momentet e panikut në bord
Fluturimi 613, me destinacion Uashingtonin, ndodhej mbi Lagos kur turbulencat e papritura shkaktuan kaos brenda kabinës. Në videot e publikuara nga pasagjerët, shihen korridoret e avionit të mbushura me sende të rrëzuara dhe njerëz të shqetësuar nga lëkundjet e forta.
Avioni Boeing 787-8 kishte në bord 245 pasagjerë, tetë anëtarë të ekuipazhit dhe tre pilotë. Fluturimi u devijua menjëherë dhe pas 93 minutash nga ngritja, avioni kreu ulje emergjente në Lagos.
Në një komunikatë zyrtare, linja ajrore sqaroi se:
“Aeroplani u ul i sigurt në Lagos. Katër pasagjerë dhe dy anëtarë të ekuipazhit pësuan lëndime të lehta, u trajtuan në spital dhe u liruan.”
Sipas të dhënave nga “FlightRadar24”, ky avion kishte kryer një ulje emergjente disa ditë më parë në të njëjtën rrugë. Aktualisht nuk është konfirmuar nëse këto dy incidente janë të lidhura me probleme teknike të avionit.