Pakti i armëve Rusi-Kore e Veriut dhe bombardimet në Kiev, rrisin frikën për “Luftën e Tretë Botërore”! Paralajmërimi i Papa Françeskut merr formë
Tensionet globale po marrin një kthesë të rrezikshme, pas raportimeve se raketat e lëshuara nga Rusia drejt Kievit ishin furnizuar nga Koreja e Veriut. Ky zhvillim përfaqëson një hap të qartë drejt përshkallëzimit të luftës në Ukrainë, duke rritur shqetësimet se bota po afrohet me një konflikt të përmasave botërore.
Burime ndërkombëtare konfirmojnë se raketat e përdorura për sulmin e djeshëm në kryeqytetin ukrainas janë pjesë e një bashkëpunimi ushtarak mes Moskës dhe Phenianit, një aleancë që po fuqizon potencialin shkatërrues të ushtrisë ruse. Ekspertët e sigurisë paralajmërojnë se ky bashkëpunim jo vetëm që minon përpjekjet për paqe, por edhe përhap konfliktin në një përmasë të rrezikshme rajonale dhe globale.
Në këtë kontekst, vlerësimi i Papa Françeskut se bota është duke përjetuar një “Luftë të Tretë Botërore pjesë-pjesë” po duket gjithnjë e më i saktë. Kjo deklaratë, e përsëritur nga kreu i Kishës Katolike gjatë viteve të fundit, tingëllon sot më alarmuese se kurrë.
Sipas analistëve të sigurisë ndërkombëtare, inxhinierët rusë po kontribuojnë në përmirësimin teknologjik të raketave të Koresë së Veriut, duke ndikuar drejtpërdrejt në rritjen e kapacitetit ofensiv të Kremlinit. Ky bashkëpunim tregon një rreth vicioz, ku dy regjime të izoluara po i japin fuqi njëra-tjetrës në kurriz të paqes botërore.