Operacioni “Ura” shkatërron 3 supergrupe kriminale shqiptare e italiane, Eurojust: Përgjimet e koduara çuan në kapjen e 5 milionë eurove dhe 1800 kg drogë
Operacioni i madh ndërkombëtar i koduar “Ura”, i zhvilluar në bashkëpunim mes autoriteteve italiane dhe atyre shqiptare, ka rezultuar në një ndër goditjet më të mëdha kundër krimit të organizuar.
Sipas njoftimit zyrtar të EUROJUST, janë shpallur në kërkim 52 persona, pjesë e tre organizatave të fuqishme kriminale që operonin në trafikun ndërkombëtar të drogës dhe pastrimin e parave.
Hetimet e thelluara që prej vitit 2016, përgjimet e koduara dhe monitorimi intensiv sollën zbardhjen e skemave kriminale që përfshinin mbi 1800 kilogramë kokainë dhe heroinë, si dhe kapjen e afro 5 milionë eurove cash.
Njoftimi i EUROJUST:
Njoftimi i plotë i EUROJUST:
“Me ndihmën aktive të Eurojust-it, autoritetet në Itali dhe Shqipëri i kanë dhënë një goditje të madhe tre grupeve të lidhura të krimit të organizuar (OCG) të përfshira në trafikun në shkallë të gjerë të drogës dhe pastrimin e parave.
Gjatë një dite aksioni të përbashkët, urdhër-arrestet u lëshuan kundër 52 të dyshuarve, duke përfshirë individë që besohet se ishin në nivelet më të larta në hierarkitë e OCG-ve. Eurojust mbështeti bashkëpunimin midis autoriteteve italiane dhe shqiptare duke ngritur një ekip të përbashkët hetimor (JIT).
Hetimet për organizatat kriminale të lidhura u nisën në vitin 2016 nga Prokuroria Publike e Barit dhe Prokuroria Speciale Kundër Korrupsionit dhe Krimit të Organizuar Tiranë dhe Policia shqiptare. Nga ana shqiptare, një OCG, e cila operonte nga Durrësi, ishte përgjegjëse për transportin dhe shpërndarjen me shumicë të sasive të mëdha të kokainës, heroinës dhe kanabisit të trafikuara midis Ballkanit, Evropës Veriore, Amerikës së Jugut dhe Pulias në Itali.
Dy banda kriminale të drejtuara nga Italia kryenin prerjen dhe paketimin e drogave të paligjshme dhe furnizonin kokainë dhe heroinë nga Amerika Latine dhe Turqia për bandat lokale në organizata në Bari, Brindisi dhe Lecce.
Arrestimet në Itali dhe Shqipëri janë rezultat i një bashkëpunimi afatgjatë nëpërmjet EPH. Kjo përfshinte përdorimin e përgjimeve, vëzhgimin intensiv me video, monitorimin e të dyshuarve dhe analizën e bisedave të koduara. Këto biseda u dekriptuan pas bashkëpunimit intensiv përmes Eurojust-it.
Që nga viti 2020, Eurojust ka mbështetur autoritetet në Itali dhe Shqipëri me JIT. Gjithashtu, Agjencia ka ofruar asistencë në realizimin e kërkesave për ndihmë të ndërsjellë juridike gjatë ditës së veprimit dhe ka dhënë mbështetje gjyqësore ndërkufitare. Shqipëria është një nga dymbëdhjetë vendet jashtë Bashkimit Evropian me një prokuror ndërlidhës në Eurojust. Hetimet u koordinuan dhe u mbështetën gjithashtu nga zyra e ekspertit të përkushtuar të sigurisë në Ambasadën Italiane në Tiranë.
Bashkëpunimi gjyqësor ndërmjet Italisë dhe Shqipërisë është treguar tashmë efektiv vitet e fundit. Ndërmjet viteve 2018 dhe 2021, Drejtoria e Hetimit Antimafia e Barit lëshoi dhe ekzekutoi 118 urdhër-arreste kundër trafikantëve të dyshuar të drogës që vepronin në të dy vendet. Për pasojë, të pandehur të ndryshëm u dënuan deri në 20 vjet burgim.
Operacioni i kësaj jave u krye me kërkesë dhe nga autoritetet e mëposhtme:
Itali: Prokuroria Publike Bari – Drejtoria e Qarkut Antimafia; Drejtoria e Hetimit Antimafia Bari, nen koordinimin e Drejtorise Kombetare Antimafia dhe Antiterrorizmit Rome, me mbeshtetjen e Zyres se Ekspertit te Sigurise prane Ambasades Italiane ne Tirane.
Shqipëri: Prokuroria Speciale Kundër Korrupsionit dhe Krimit të Organizuar (SPAK) e Tiranës; Policia Shqiptare”.