Nuk po gjen minuta, Roma shenjëstron të ardhmen e mesit të fushës

Situata e Davide Frattesi vazhdon të jetë një nga temat më të diskutuara në gazetat sportive.

Sipas “Corriere dello Sport”, dëshira e mesfushorit për t’u rikthyer te Roma mbetet e gjallë, por ajo përplaset me nevojat ekonomike të Interit.

Klubi zikaltër, sipas të përditshmes romake, tani “ngre murin”, duke iu referuar kërkesave legjitime ekonomike në rast të një tratative. Frattesi do të dëshironte të kthehej në kryeqytet për të pasur më shumë minutazh në prag të Kupës së Botës 2026.

“Lojtari nuk është i kënaqur dhe beson se meriton më shumë mundësi sesa 45 minutat e luajtura në shtatë ndeshjet e fundit të Serie A – shkruhet në gazetë. – Mes tyre janë tre ndeshje titullari në kupat evropiane, por kjo nuk i mjafton, sidomos pasi ka dëshmuar, kur është përdorur më shpesh – si te Interi ashtu edhe në Kombëtare – se mund të jetë një burim i vlefshëm edhe në fazën realizuese, me gjashtë golat dhe një asist të shënuar mes zikaltërve dhe azzurrëve”.

Roma e merr seriozisht këtë çështje dhe Frattesi është i gatshëm, por në mes qëndron Interi. Sinjale pozitive, nga ky këndvështrim, nuk kanë ardhur. Problemi, siç është thënë, nuk është paga e lojtarit, por vlera e kartonit të tij. Strategjia e Interit është të mos bëjë asnjë lëvizje në janar dhe, nëse vërtet do të mendonte për shitjen e Frattesi-t, do të kërkonte një përfitim të rëndësishëm financiar: sipas CdS, aktualisht në treg diskutohet për një kërkesë nga zikaltërit prej 45-50 milionë eurosh.

Nga ana tjetër, vetë Frattesi, përtej minutave të pakta të lojës, nuk ka asnjë qëllim të përplaset me klubin zikaltër. Përkundrazi, ai është gjithmonë mirënjohës që Interi ka besuar te ai dhe e ka blerë dy verë më parë me një shifër të rëndësishme, pasi Roma vendosi të përfitojë nga 30% e rivlerësimit të tij në vend që të investonte tek ai.

Pellegrini? Interi duket se nuk është i interesuar.