Nuk mori mandatin e deputetit, Ilir Meta reagon nga burgu: Fushatë e pabarabartë! Do luftoj gjithmonë për kauzat madhore
Ilir Meta, presidenti i Partisë së Lirisë, nuk arriti të sigurojë votat e nevojshme për t’u bërë pjesë e parlamentit të ardhshëm. Meta garonte nën siglën e koalicionit ‘Për Shqipërinë Madhështore’, të drejtuar nga Sali Berisha, dhe ndodhej në listën e hapur të Tiranës.
Në një mesazh nga burgu, Meta ka reaguar përmes një postimi në Facebook, duke falënderuar qytetarët që e mbështetën me votë në zgjedhjet e 11 majit, por njëkohësisht ka denoncuar fushatën si të pabarabartë.
Ai theksoi se standardet e zgjedhjeve, demokracia dhe shteti i së drejtës u cënuan, duke e konsideruar këtë një goditje për përfaqësimin e lirë të qytetarëve.
Meta, i cili ndodhet në burg për akuza të rënda, u distancua nga çdo tentativë për të siguruar mandat parlamentar përmes dorëheqjeve të kandidatëve në listën e Partisë së Lirisë në Tiranë, duke deklaruar se një veprim i tillë do të binte ndesh me parimet dhe bindjet e tij për përfaqësim të ndershëm.
Reagimi i Ilir Metës:
Për mua ata nuk janë votues por heronj dhe do të gëzojnë përjetë të gjithë mirënjohjen time të pakufijshme.
Disa zëra dashamirës, por edhe të tjerë djallëzorë, sugjerojnë si mënyrë për marrjen e mandatit tim parlamentar, dorëheqjen e kandidatëve të Partisë së Lirisë në listën e mbyllur të Qarkut Tiranë.
Dua t’i siguroj të gjithë se Ilir Metaj që nga viti 2008, që kur u bënë ndryshimet e mbrapshta kushtetuese, ka luftuar për përfaqësim vetëm nëpërmjet vullnetit të lirë dhe të hapur të qytetarëve, në mënyrë të vazhdueshme dhe parimore, sepse kjo është çështje e bindjes dhe karakterit tim dhe si pasojë nuk mund të pranoj asnjë marifet apo zgjidhje pragmatiste që shkon në kundërshtim me kauzat madhore për cilat unë kam luftuar dhe do luftoj gjithmonë.
Një falenderim të veçantë edhe për të gjithë ata komisionerë, numërues dhe vëzhgues, të cilët po vazhdojnë me këmbëngulje dhe përgjegjësi të lartë të numërojnë dhe të mbrojnë çdo votë deri në votën e fundit.