Nuk lejonte gruan të punonte, gjykata italiane dënon burrin për kontroll dhe denigrim
Një rast i pazakontë ka përfunduar me vendim gjyqësor në Torino të Italisë, ku një burrë është dënuar pasi i ndalonte bashkëshortes së tij të punonte jashtë shtëpisë.
Fillimisht, gruaja punonte në kompaninë e bashkëshortit të saj, por pa u deklaruar dhe pa marrë rrogë. Kur ajo vendosi të gjejë një punë tjetër në sektorin e turizmit, burri i saj i bëri presion të vazhdueshëm për ta detyruar të largohej dhe të kthehej në shtëpi për t’u kujdesur për fëmijët.
E lodhur nga kjo situatë, gruaja vendosi ta padisë atë në gjykatë. Pas shqyrtimit të çështjes, gjyqtarët e shpallën burrin fajtor për veprën penale të kontrollit dhe denigrimit, duke e dënuar me gjobë.
Synim për të penguar emancipimin ekonomik
Në vendimin e tyre, gjyqtarët theksuan se sjellja e burrit synonte të pengonte gruan të fitonte pavarësinë e saj ekonomike, duke e detyruar të qëndronte në varësi të tij dhe në rolin tradicional të kujdesit për fëmijët.
Ky rast ka ngritur diskutime mbi të drejtat e grave dhe barazinë gjinore në Itali, duke sjellë në vëmendje rëndësinë e mbrojtjes ligjore ndaj sjelljeve të tilla denigruese dhe kufizuese.