Një ditë pas thirrjes në SPAK, Bushka nuk drejton Komisionin e Ligjeve/ Deputeti : Të dalim me deklaratë të përbashkët, të distancohemi nga veprimet e saj
Një ditë pas dëshmisë së Klotilda Bushkës në SPAK në lidhje me dosjen që ka të bëjë me kryebashkiakun Erion Veliaj, ajo nuk ka drejtuar më Komisionin e Ligjeve. Pas një mungese të papritur, në vendin e saj ka qenë zëvendëskryetari i komisionit, deputeti i Partisë Socialiste, Eduard Ndreca.
Kjo ka shkaktuar reagime të shumta, përfshirë edhe një deklaratë të fortë nga deputeti i Partisë Demokratike, Dashnor Sula. Ai kërkoi që të gjithë anëtarët e Komisionit të Ligjeve, të mazhorancës dhe opozitës, të dalin me një deklaratë të përbashkët për të distancuar veten nga veprimet e Bushkës.
Në fjalën e tij, Sula theksoi se kryetarja e Komisionit të Ligjeve, Klotilda Bushka, kishte dëmtuar rëndë imazhin e komisionit me veprimet e saj. Ai e cilësoi si të papranueshme që një person në një pozicion të tillë të ndërhynte në hetimet për kryebashkiakun Erion Veliaj, duke përmendur se kjo ishte një kundërshtim i hapur i ligjit.
“Ky komision do të duhet të kishte pasur një qëndrim dhe nuk mund të kalojë në një gjendje kaq të heshtur. Të gjithë anëtarët e komisionit të ligjeve, mazhorancë dhe opozitë së bashku, duhet të bënim një deklaratë të distancimit. Është e paimagjinueshme që kryetarja e Komisionit të Ligjeve të jetë personi që ka kryer veprime në kundërshtim të hapur me ligjin,” u shpreh Sula.
Ai shtoi se ky veprim ishte një ndërhyrje e papranueshme që kishte penguar hetimin e drejtësisë për kryetarin e bashkisë së Tiranës, Erion Veliaj, dhe se kjo veprimtari ishte një akt “i pafalshëm” dhe “me një vetëdije të paparë” për pengimin e procesit të hetimit.
Sula kërkoi që komisioni të shprehte qartë qëndrimin e tij dhe të distancohej nga veprimet e kryetares së tij. Ai theksoi se një qëndrim i heshtur do të dëmtonte akoma më shumë reputacionin e Komisionit të Ligjeve dhe të gjithë procesin ligjor.
Kjo ngjarje ka hapur një debat të gjerë politik, ku akuzat për ndërhyrje në hetime dhe veprime të dyshimta përfshijnë një nga pozitat më të larta të legjislaturës shqiptare, duke shtuar tensionet mes opozitës dhe mazhorancës.