Në kërkim prej 2021 për vrasjen e kamarierit, RENEA dhe FNSH bastisin banesën e Erjon Llapushit

Forcat RENEA, FNSH dhe ato operacionale kanë zhvilluar një aksion të gjerë në Pogradec, ku ndër të tjera bastisën banesën e Erjon Llapushit, një 34-vjeçar me precedent të rëndë kriminal.

Llapushi është i shpallur në kërkim që prej vitit 2021 për vrasjen makabre të kamarierit Gazment Kurmaku në Elbasan. Ngjarja tragjike ndodhi më 2 tetor, kur Llapushi, për shkak të një mosmarrëveshjeje për një tavolinë, e kapi nga fyti viktimën, e kërcënoi me thikë dhe më pas e goditi për vdekje.

Në krim ishte i pranishëm edhe bashkëpunëtori i tij, Luan Dulellari, i cili nuk ndërhyri për të ndaluar sulmin ndaj viktimës, por zgjodhi të arratisej pas ngjarjes.

Dënimet dhe precedentët penalë të Erjon Llapushit

Llapushi ka qenë më parë i dënuar për veprat penale “plagosje e rëndë me dashje” dhe “mbajtje pa leje e armëve dhe municioneve”. Ai njihet si një person mjaft problematik dhe një shqetësim i vazhdueshëm për Policinë e Korçës dhe Pogradecit, për shkak të përplasjeve të shpeshta me persona të tjerë.

Në korrik të vitit 2024, Prokuroria e Elbasanit kërkoi 20 vite burg për Llapushin për akuzën e “vrasjes me dashje.”

Operacioni i fundit

Banesat e tij dhe disa objekte të tjera u bastisën gjatë një aksioni të koordinuar nga RENEA dhe FNSH, por ende nuk ka detaje për gjetjen apo arrestimin e tij. Policia vazhdon kërkimet për kapjen e tij, ndërsa apelohet për bashkëpunimin e qytetarëve që mund të kenë informacione mbi vendndodhjen e tij.

Erjon Llapushi mbetet një prej personave më të kërkuar në Shqipëri, për shkak të historisë së tij kriminale dhe rrezikshmërisë që paraqet për komunitetin.